Tidleg mørketidsdepresjon

Ann Charlotte Franke er akupunktør og homeopat i Ulsteinvik. Ho tilbyr lysbehandling, og ho opplever at svært mange av pasientane er deprimerte på grunn av veret.

- Eg får besøk av mellom 15 og 20 personar kvar dag, og dei siste vekene har jamt over halvparten av desse klaga si naud over veret, fortel ho.

Spesielt tidleg

Franke fortel at ho ikkje har opplevd så stor pågang så tidleg på året før.

- I fjor hadde vi ein kjempe flott haust, med sol langt ut i oktober. Det merka eg også på pasientane mine. No er veret grått og trist, og sjølv om det berre er september enno, slit svært mange med versjukdom, seier ho.

Dagslys er løysinga

Dårleg motivasjon, lite arbeidslyst og problem med å stå opp om morgonen er nokre av teikna på versjuke eller mørketidsdepresjon. Men det fins enkle råd for dei som ikkje er alvorleg angripe, fortel Franke.

- Ein time med dagslys kvar dag, uansett ver, det hjelp, seier ho.

- Sjølv om det er grått og trist, så er det viktig å kome seg ut og halde seg i aktivitet. Då kan motivasjonen og humøret kome tilbake.