Vindmølleparken stengd

Ulykka skjedde sist laurdag i ein vindkraftstasjon i Oregon. Tårnet som held sjølve turbinen og rotorblada knakk i to litt ovanfor midten, og ein vedlikehaldsarbeidar på toppen døydde i fallet, skriv avisa The Oregonian. Ein annan arbeidar inne i tårnet blei alvorleg skadd.

Fleire knekte tårn

Avisa skriv også at eit liknande tårn i eit anna  vindkraftverk i Oregon blei bøygt og vridd i eit kraftig vindkast i fjor. I 2005 knakk eit turbintårn i Oklahoma i to, og i januar i år braut eit tårn saman i Japan.

Ukjend årsak

Det er Siemens som har bygt både vindturbinen som braut saman i USA laurdag og vindkraftverka på Smøla, Hitra og i Kjøllefjord. - Vi set omsynet til tryggleiken øvst, og vil vere på den sikre sida til vi veit årsaka til ulykka i USA. Derfor stengjer vi no vindparkane våre for vanleg ferdsel, seier pressetalsmann Knut Fjerdingstad i Statkraft.