- Ein boom utan sidestykke

Det viser ein analyse som Møreforsking har gjennomført, og som blir offentleggjort på Høgskulen i Ålesund i ettermiddag.

Det har vore ein boom utan sidestykke, seier økonomiprofessor Arild Hervik som har vore med å laga rapporten.

Gode etter 2010 

Forskarane trur marknaden for den maritime næringa også vil vere svært god etter 2010.

- Det er to grunnar til det. Med den høge oljeprisen vil det løne seg å bore etter olje og då vil det vere behov for å byggje supplybåtar og ankerhandteringsfartøy. Dernest vil det vere behov for å fornye dei båtane som allereie er i bruk, seier Hervik.

Det betyr arbeid for skipsverfta og bedrifter som leverer utstyr. Mange er full-booka fram til 2009-2010, men forskarane trur ikkje det stoppar her.

- Mange har frykta at ballongen vil sprekke, men det er all grunn til å sjå på framtida med optimisme, seier Hervik.

Tette band

Det er eit tett samspel og det er tette band mellom reiarar, skipsverft, utstyrleverandørar og skipskonsulentar i Møre og Romsdal. Det er dette som blir kalla den maritime klynga. Dette gir næringa kraft og styrke, meiner forskarane.

- Desse banda har lang tradisjon og dei har styrka seg dei siste åra, meiner Hervik.

Oljeprisen

Så lenge det løner seg å bore etter olje sit den maritime næringa på den gyldne grein. Trusselen er ein oljepris i fritt fall. Men låg oljepris vil vere et forbigåande fenomen, trur forskarane.

- Vi trur ikkje oljeprisen vil halde seg låg så veldig lenge og når den kjem opp att vil det vere behov for å byggje båtar, seier Hervik