Får refs for forhold til klient

Klienten var brukar av dagsenteret der kvinna arbeidde. Ifølgje tilsynet hadde kvinna rolle som behandlar for mannen då forholdet starta. Assisterande fylkeslege i Møre og Romsdal, Cato Innerdal, seier dei reagerer sterkt.

– Slike forhold er i strid med all yrkesetikk og helselover, seier Innerdal til NRK.

Dei to skal ha møttest private i fleire månader, også heime hos mannen, noko kvinna har vedgått.

Innerdal seier dette er klare brot på reglar og rutinar. Helsetilsynet meiner også kvinna med dette har vist manglande rolleforståing og forståing for brukaren sin situasjon.

–Generelt ser vi i tilsynet alvorleg på det når nokon ikkje er bevisste på å skilje mellom private og profesjonelle roller. Og forhold til pasientar og klientar er absolutt noko helsepersonell skal avstå frå, seier Innerdal.

• Les også: Forelska seg i pasient - må gå til psykolog
• Les også: Granskar fysioterapeutar som ikkje fører journal

Har slutta i jobben

Sosionomen jobbar ikkje lenger ved dagsenteret og har også avslutta arbeidsforholdet til etaten har var tilsett i. Om den strenge påtalen seier Innerdal at dette er eit klart signal.

– Det i seg sjølv er eit signal til denne arbeidsgjevaren og også til framtidige arbeidsgjevarar, seier Innerdal.