Nådde ikkje opp

Ein skal halda tunga rett i munnen for å halda styr på alle prisane som vert delt ut når fotballen feirar seg sjølv etter sesongslutt.

Folkejuryar, klubbane og spelarane sjølv skal alle gjennomføra sine kåringar. Men i dei fleste samanhengar går ein mann att - Erik Huseklepp.

Men trass i at Sandsli-karen var nominert til Gullballen, årets mål, årets angripar og årets Kniksen, har det sålangt berre vorte nesten for Huseklepp.

Slått av siddis og svenske

I dag vart Kniksen-prisane, som er Norsk toppfotball sine prisar, delt ut i samband med cupfinalen. Rosenborg-spiss Rade Prica snaut ikkje berre Huseklepp for toppskårartittelen, han vart og tildelt prisen som årets angripar.

Fulham-proffen Brede Hangeland stakk som venta av med den andre Kniksen-prisen Huseklepp var nominert til, og for femte gong på rad gjekk "Årets Kniksen" til ein utanlandsproff.

Fredag var det Cecilie Pedersen og Mads Hansen som tukta Brann-spelaren i kampen om Gullballen og årets mål.

Fleire kort på handa

Men Huseklepp har framleis fleire sjansar til å få fylt opp premieskapet. Han er blant dei tre som har fått flest røyster i kampen om fire av spelarorganisasjonen NISO sine prisar.

Bergensaren kjempar om verta årets norske spelar, årets spelar i Eliteserien, årets profil og kåringa for årets prestasjon. I dei tre førstnemnde kåringane er det spelarane sjølv som røystar fram vinnaren.

Prisutdelinga foregår på Grand Hotel klokka 20.30 i kveld.

Då får ein svaret på om Huseklepp når opp eller om det igjen berre vert nesten...

Desse vart Kniksen-vinnarar:

• Årets målvakt: Jon Knudsen, Stabæk
• Årets forsvarsspelar: Knut Olav Rindarøy, Molde
• Årets midtbanespelar: Makhtar Thioune, Molde
• Årets angrepsspelar: Rade Prica, Rosenborg
• Årets trenar: Kjell Jonevret, Molde
• Årets dommar: Kristoffer Helgerud
• ÅRETS KNIKSEN Brede Hangeland, Fulham

Desse vann prisar under Gullballen:

• Årets kvinnelege dommar: Monica Larsen, Bækkelaget
• Årets mannlege dommar: Kristoffer Helgerud, Lier
• Årets fairplay-pris, menn: Geir Ludvig Fevang, Start
• Årets fairplay-pris, kvinner: Lene Storløkken, Team Strømmen
• Talentprisen: Ruben Yttergård Jensen, Tromsø
• Beste spelar i TK Futsalliga: Stian Reinertsen, Nidaros
• Årets mål: Mads Hansen, Mjøndalen
• Årets kvinnelege fotballspelar: Isabell Herlovsen, Kolbotn
• Årets mannlege fotballspelar: Brede Hangeland, Fulham
• Grasrotprisen: Kolstad IL
• Årets trenar: Ståle Solbakken
• Gullballen: Cecilie Pedersen, Avaldsnes
• Kniksens Hederspris Karen Espelund