Sorenskrivar: – Det rann vatn frå taket og ned på sakspapira mine

– Det er ikkje lenge sidan det rann vatn frå taket på kontoret mitt og ned på sakspapira mine, seier sorenskrivar Håkon Rastum til NRK.no.

Vi er med rundt for å sjå på tilstanden til bygget, som ikkje har vore pussa opp sidan det var nytt i 1933.

• Her kan du sjå 3D-animasjon som viser tinghuset både utvendig og innvendig

Oppussing til 815 millionar

– Det går jo ut over både dei som arbeider her, og dei som er involvert i alle rettssakene på tinghuset, seier Rastum.

Det er mykje å ta igjen, og Statsbygg har sett prislappen på arbeidet til svimlande 815 millionar kroner.

– Det er jo eit formidabelt beløp, innrømmer Jann Ola Berget i Domstolsadministrasjonen.

Verneverdig

Han meiner likevel ein kan forsvara å bruka bortimot ein milliard kroner på det verneverdige rettsbygget.

– Det er gjort svært lite sidan det var nytt. Derfor er det mykje arbeid som må gjerast for at bygget igjen skal tilfredsstilla dagens krav, seier han.

No håpar Berget at pengane kjem på neste statsbudsjett.

Arbeidet er så omfattande at all aktivitet i tinghuset må flyttast til andre lokale i byggeperioden.

• Les meir på nettsidene til Statsbygg