– Ein siger for humanismen i Noreg

Stortingsmeldinga om born på flukt skal komme før sommarferien. Men onsdag vart mykje av innhaldet klart.

UNE for strenge

Regjeringa vil ikkje endre lova for asylborna, men i meldinga vert det understreka at Utlendingsnemda (UNE) er for strenge. Dei seier at vedtaket frå 2007 om at born si tilknyting til Noreg skal leggjast stor vekt på, skal følgast betre opp.

No vil regjeringa at borna si tilknyting til Noreg skal vege meir, og ber om ei meir eintydig sakshandsaming.

Det betyr at dei om lag 450 asylborna som har fått avslag på asylsøknaden sin til trass for å ha budd lenge i landet, no kan søke om ei ny vurdering, med større sjanse for å få bli.

– Var inhumant

Oddny Miljeteig (SV) har følgt asylborn-saka tett, og er strålande nøgd med stortingsmeldinga.

– Endeleg er asylpolitikken for born komen på beina, seier ho.

Ho meiner den politikken som har vorte ført dei siste åra, er inhuman.

– Det er umenneskeleg mot borna det gjeld, og då må til og med justisminister Grete Faremo gje seg, meiner ho.

Nathan kan få bli

Nathan Ashete er 7-åringen som har blitt eit bilete på asylborna. No har han ein ny sjanse til å få bli i landet han er fødd og oppvaksen i, men som ikkje vil gje han asyl.

Aina Heldal Bøe i støttegruppa for Nathan trur stortingsmeldinga kan vere nøkkelen til ei framtid i Noreg for guten frå Arna.

– No kan dei prøve saka på nytt og då skal det takast meir omsyn til den tilknytinga han har til landet. Eg trur meldinga kan komme mange asylborn til gode, seier Heldal Bøe.

Ho held likevel tilbake litt av jubelen.

– Me må jo sjå vedtaka fyrst, men det ser absolutt positivt ut.

– Ein siger

– Dette er ein siger for SV, for AUF og for alle dei som har kjempa for ein meir human asylpolitikk. Det er rett og slett ein siger for humanismen i Noreg, seier Oddny Miljeteig.

SV-politikaren har no god tru på at Nathan og mange av dei andre asylborna skal få bli i landet.

– No har eg ro i sjela når det gjeld Nathan. Det vert presisert at ein skal legge større vekt på born si tilknyting til landet og at all opphaldstid skal telje. Dette vil føre til at veldig veldig mange vil få bli, seier ho.