Utan politibåt på grunn av konkurs

Sommaren 2009 fekk Hordaland politidistrikt ein splitter ny politibåt.

Med to motorar på tilsaman 1500 hestekrefter kan båten gå i over 60 knop.

Politibåten Kjølen er eigd av Djupevåg båtbyggeri i Norheimsund, men politiet har hatt ein langsiktig leigeavtale med båteigaren.

Det gjekk heilt fint fram til båtbyggeriet gjekk konkurs i november. Då blei båten ein del av konkursbuet, og kan ikkje lenger brukast av politiet.

Skaper problem

Visepolitimeister John Reidar Nilsen i Hordaland politdistrikt innrømmer at dette ikkje er ein gunstig situasjon.

– Det er ikkje krise, men heller ikkje ønska, seier Nilsen.

Han peikar på at det kan bli problem viss det er behov for politiet på øyer eller på sjøen.

Alternativet for politiet er å be om hjelp frå andre som har båtar tilgjengeleg.

– Vi har ein avtale om at vi kan be om bistand frå Forsvaret, seier Nilsen.

– Ikkje godt nok

Monica Nilsen (Frp) i Hordaland fylkesutval meiner dette ikkje er godt nok.

– Det kan få store konsekvensar viss det skjer ei ulykke. Det er trafikk på sjøen heile året, seier ho.

Politiet har lagt inn eit bod om å få kjøpa politibåten frå konkursbuet, men veit ikkje enno om dei vil få tilbake den gamle båten.

Inntil vidare står båten på land.