Bjølleklang på sjukehus

Stord sjukehus må i sommar leggje fleire pasientar på gangen. Grunnen er sommarstengning av ei avdeling.

Det skriv bladet Sunnhordland.

– Me har bra bemanning, men for lite plass, seier sjukepleiar Målfrid Halleraker.

Vanskeleg å hindre innsyn

Ho fortel at dei har satt opp skjermbrett for å hindra innsyn til pasientane, men at noko innsyn ikkje er å unngå. I tillegg har ikkje pasientane den vanlege måten å varsle om at dei treng hjelp.

– Me har ikkje ringjesnor på gangen, men kvar pasient har ei sauebjølle som ein han ringje med om ein treng hjelp, seier Halleraker.

LES ÒG: Fortsatt mange gangpasienter | - Uverdige forhold for fødende | Presset til å bo på pasienthotell

– Gjer så godt dei kan

Dei pårørande på sjukehuset er oppgidde, men vil ikkje skulde på personalet.

– Eg opplevde at personalet var oppgjevne over situasjonen, dei kunne ikkje gjera noko med det. Personalet gjer jo så godt dei kan, seier ein pårørande.

Orsakar

Sjukehusleiinga kan ikkje anna enn å orsake for situasjonen.

– Grunnen til at det ligg pasientar på gangen, er at me sommarstid stengjer ei avdeling grunna mindre belegg og fordi det er vanskeleg å skaffe sommarvikarar. Det er synd at det ligg pasientar på gangen, og det er ikkje ei slik service me vil yta, seier fungerande administrerande direktør i Helse Fonna, Helga Stautland Onarheim.