Uføre døyr før i rike nabolag

– Me har mykje forskning som tyder på at folk si helse vert påverka av det nabolaget ein bur i, seier professor i sosialmedisin, Bjørgulf Claussen.

På bakgrunn av statistikk om uføre og dødsfall har forskar og professor Jon Ivar Elstad funne ut at uføre som har naboar med høg inntekt har høgare risiko for å døy enn uføretrygda som har naboar med same inntektsnivå som dei sjølve.

– Å vera og med forholdsvis lav inntekt i eit velståande strøk, kan opplevast som stigmatiserande og som at ein skiljer seg ut frå nabolaget. Det kan auke risikoen for å verte sjuk, og auke risikoen for å døy, seier han.

– Mykje som tyder på dette

Professor på psykologisk fakultet ved Universitetet i Bergen, Arnstein Mykletun, seier at dette føyer seg inn i forskning som tyder på det same.

– Om det er akkurat din eigen velstand som er avgjerande, eller rett og slett kor mykje rikare eller fattigare du er i forhold til dei du samanliknar deg med som er gjeldane. Og det er det siste som ser ut til å vera riktig, seier, seier han.

LES ÒG: - Utestenger folk fra arbeidslivet

Må tenkje nytt

Helsepolitikar på Stortinget, Kjersti Toppe, meiner det må setjast i gong tiltak på fleire ulike område for å få bukt med dei sosiale forskjellane.

– Det er eit type forskjellssamfunn som eg trur me ikkje likar å erkjenne at me faktisk har i Norge, seier ho.

Ho trur det må tenkjast nytt.

– Eg trur me har ein tendens til å tenkje på helsebudsjett når me skal få til ei god folkehelse. Men me må i større grad innsjå at me må ha tiltak inn på andre områder, og at me då vil få ein helsegevinst, seier Toppe.