Ein eigen psykiatribil står no for rundt halvparten av all transport av psykisk sjuke på dag- og kveldstid i Bergen.
Det er ein stor fordel både for politi og pasientar, seier politiet og helsevesen.
Medan over 1000 psykisk sjuke hamna på glattcelle i Norge i fjor, går trenden motsatt veg i Bergen.
Stor fordel
Kvar månad frakter psykiatribilen mellom åtti og nitti pasientar. Dette er oppdrag som tidligare i stor grad måtte takast hand om av politiet.
Psykiatribilen har vore ein fordel ikkje bare for pasientane, men også i høgaste grad for politiet.
- Ei rekke av dei oppdraga politiet har vore tilkalla til når det gjeld psykiatriske pasientar har det ikkje vore god grunn til at politiet skulle gjere, seier Hillestad.
Oppfordrar storbyane
Førebels er psykiatribilen berre i bruk kvardagar, men Helse Bergen vurderer no å utvida ordninga til også å omfatta helgane.
I andre delar av landet står politiet ennå for store delar av transporten av psykisk sjuke.
Seksjonsoverlege i akuttmedisin i Helse Bergen, Guttorm Brattebø, trur fleire helseføretak no vil gjere som Bergen.
- Det har vore stor interesse frå kollegar i andre delar av landet. Dei store byane har akkurat dei same problema som Bergen har hatt. Det er ikkje tvil om at det kjem til å bli etablert andre stader i landet også.
Betre for pasientane
Brattebø er ikkje i tvil om at det er betre for pasientane å bli henta av en meir anonym bil med godt kvalifisert personale.
- Det var ikkje noko bra for ein psykriatisk sjuke å bli frakta i ein politibil når somatisk sjuke blir transportert med ambulanse. Politiet er heller ikkje fagleg kvalifisert for å driva medisinsk transport og behandling, seier Brattebø.