Får ikkje søkje anonymt

NRK fortalde i går om den irakiske kvinna Chra Karim. Ho har fireårig utdanning som bioingeniør frå Irak, og har vidareutdanna seg innan pedagogikk og språkdidaktikk etter at ho kom til Norge.

Like vel vert ho sjeldan kalla inn til jobbintervju til jobbar ho er fullt kvalifisert for.

– Det må liggje noko bak det. Eg tenkjer jo at det er mitt namn. Eit framand namn, sa Karim.

Nei i Fylkestinget

I går handsama Fylkestinget eit forslag som ville gjort det mogleg for søkjarar å vore anonyme for den som kallar inn til intervju. Mange med utanlandske namn slit med det same som Karim, og målet med forslaget var at det kun er kvalifikasjonar som skal spele inn.

Men slik vart det ikkje. Fylkestinget stemde ned forslaget.

Vil heller kvotere

– No var det slik at me i 2008 laga ein tiltaksplan for likestilling og likeverd der to av tiltaka går på dette med at ein skal ha moderat kvotering av etniske minoritetar, og det går på at dersom dei er kvalifisert, skal minst ein av dei kallast inn til intervju, seier fylkesordførar Torill Selsvold Nyborg.

– Så om me då i dag hadde gått for dette med anonymisering, då hadde me jo ikkje kunne fulgt opp desse tiltaka. Og Fylkestinget vurderte tiltaka frå 2008 som mykje betre.

De vil heller kvotere folk både i arbeid og til intervju enn å anonymisere namn?

– Ja, for det vil gi dei ein større sjanse til å komme i arbeid. Og me har ein jobb å gjere i fylkeskommunen, for me har ikkje så mange frå etniske minoritetar som me skulle ønskje. Men det er aukande. Me ser i og for seg ei positiv utvikling. Men me ønskjer å snakke med dei, og det får me ikkje gjort om me anonymiserer.

– Tal frå Gøteborg syner at det vert kalla inn fleire innvandrarar?

– Ja, men dersom ein går nærare inn i dei undersøkjingane, så syner det at sluttresultatet ikkje er særleg gunstig for dei frå etnisk minoritet. Det har ikkje komme fleire inn.