Tre sendt til sjukehus

Klokka 19.30 fekk politiet melding om ein kollisjon på E39 ved Liareid i Sveio.

– Tre personar skal ha blitt skadde og dei er blitt sendt til Haugesund sjukehus. Me kjenner ikkje skadeomfanget, men dei skal ikkje vera livstrugande skadde, seier operasjonsleiar Oddvar Olsen i Haugaland og Sunnhordland politidistrikt.

Politiet opplyser at kollisjonen truleg skjedde i høve ei forbikøyring.

Like før klokka 20 skjedde det ei trafikkulukke også på Sotra. Ulukka skjedde ved avkøyrsla til Bildøybakken, på vestsida av Kolltveittunnelen.

– To bilar var involvert i uhellet, og to personar er blitt henta av ambulanse og sendt til legevakta. Me kjenner ikkje til skadeomfanget, seier operasjonsleiar Oddvar Nordfonn i Hordaland politidistrikt.

Uhellet skal ha skjedd då føraren av den eine bilen ikkje overheldt vikeplikta.

Politiet fekk omtrent samstundes melding om eit trafikkuhell ved Hagaåstunnelen i Samnanger.

– To bilar kolliderte då den eine føraren ikkje overheldt vikeplikta. To personar blei sendt til Haukeland sjukehus. Ei kvinne, som var passasjer i den eine bilen, skal ha fått smerter i brystet og pustevanskar, seier Nordfonn.