Tala for september vart i dag presentert av Norges Eiendomsmeglerforbund, og dei viser ein nedgang på over sju prosent samanlikna med på same tid i fjor.
Kurt Buck, leiar i forbundet si avdeling på Vestlandet, meiner det er naturleg at prisane minkar mest i Bergen sentrum.
- Bergen sentrum har i ein periode vore området der prisane har auka mest, så det er ikkje unaturleg om det kjem ein korreksjon slik me ser no, seier Buck til NRK Hordaland.
Gjennomsnittleg kvadratmeterpris er no 30.100 kroner i bydelane Bergenhus og Årstad.
Fana og Ytrebygda minkar minst
Medan det er i Bergen sentrum, Arna og Åsane prisane går mest tilbake, er det i Fana, Ytrebygda og Hordaland utanom Bergen endringane er minst.
Buck meiner det er fleire grunnar til fallet i bustadprisane. Men han meiner uroen på den internasjonale finansmarknaden er ein viktig årsak.
- Det er mange årsaker, men den voldsomme fokuseringa på finanskrisa er nok ei viktig årsak til at mange vegrar seg for å gå inn i marknaden, seier Buck.
Trur på betring
Buck trur likevel på betre tider for eigedomsmeklarane og dei som skal selja bustad.
- Sjølv om det er vanskeleg å spå i desse tider, trur eg personleg at prisane kjem til å betra seg på vårparten, seier Buck.