Brannvesenet rykka ut til storbrann hos dykkarfirmaet IMC Diving i Sandviken klokka 17.30 mandag ettermiddag.
- Mange eksplosjonar
Vår reporter Karoline Kalstveit fortalde rett etterpå at det stadig kunne høyrast eksplosjonar frå brannstaden.
Det var kraftig røyk og enorme flammar, og røyken var synleg langt unna brannstaden.
- Politiet kom og ba oss gå innandørs på Bergen Arkitektskole og lukka vinduer og dører. Dei veit ikkje om det er giftige gassar i bygget, fortalde reporter Karoline Kalstveit.
- Lukk dører og vinduer
Politiet advarte mot faren for giftig gass og eksplosjonsfare og sperra av eit område på 350 meter rundt bygningane som brann.
- Det er stor eksplosjonfare på grunn av gassflasker og 2000 liter flybensin som er lagra i nærleiken av brannstaden, sa operasjonsleiar Bjarne Flokenes i Hordaland politidistrikt til NRK.
Han ba folk som bur i området om å lukka dører og vinduer og halda seg inne.
Brannvesenet stadfestar mandag kveld at dette og gjeld utover natta.
- Supplyskip var avgjerande
Supplyskipet "Skandi Admiral" kom tilfeldigvis inn fjorden akkurat då brannen starta, og pumpa store mengde sjøvatn inn over flammane.
- Innsatsen frå "Skandi Admiral" har vore heilt avgjerande for utfallet av brannen, sa vakthavande brannsjef Geir Kallekleiv til NRK seint mandag kveld.
Brannen blei meldt sløkt seint mandag kveld. Til saman tre bygningar blei totalskadde i brannen.
Arbeidet med vakthald og nedkjøling av branntomta vil halda fram utover natta og langt utover tirsdagen.
