- Det er berre å innsjå at mørkemennene har inntatt barnehagane og skulane våre. Det er berre eit tidsspørsmål før både seksualundervisninga og evolusjonslæra vert fjerna frå utdanninga i denne byen, og eit flertall veit vel gjerne også at jorda er flat, tordna Simen Willgohs frå talerstolen under måndagens bystyremøte.
Borna i Bergen skal få ei kristen og moralsk oppseding, meiner eit fleirtal i bystyret. Byrådspartia vil ikkje fjerna føremålsparagrafane i skule og barnehage. I bystyret i går stemte Høgre, Framstegspartiet og Kristeleg Folkeparti for å halda på paragrafane om kristen og moralsk oppseding.
Dette skapte ein svært oppheita debatt.
- Diskriminert av kristenopplæring
Det såkalla Bolstad-utvalet har kome med eit avkristna forslag som Kunnskapdepartementet sende ut på høyring.
Byrådspartia si støtte til kristen oppseding provoserte.
- Eg er ateist, og er ein av mange som vore diskriminert av den føremålsparagrafen som er i skulen i dag, sa partikollega Tina Åsgård.
Men ingen motargument beit på Christoffer Brun i Høgre.
- Eg trur alle i denne salen er einige i at dei grunnleggjande overordna kristne verdiar, er representative for nesten alle verdas religionar, sa Brun.
- Maken til arroganse, repliserte Oddny Miljeteig (SV).
Sjølvmotseiing
Abdelmajid Jerad frå Arbeiderpartiet meiner den kristne formålsparagrafen diskriminerer folk med andre religionar.
- Det er sjølvmotsigande når byrådet vil bruke ein million kroner på å få innvandrarar til å sende borna sine i barnehagen, når dei skal bli opplært i kristendommen, meiner han.
Det som provoserte opposisjonen mest var Høgre si haldning til saka.
- Eg synest det er heilt utruleg at Høgre som eit liberalt parti kan bli ein rævediltar etter menigheita Levende Ord, meinte Odd Rambøl (Ap).
Kommentaren fekk ordførar Gunnar Bakke til å definere bergensk parlamentarisme.
- Hadde det ikkje vore for at vi var i denne byen, så hadde ikkje den fråsegna vore innanfor det parlamentariske.