Fleire samningar

Les òg: Skråblikk på jubilanten.

- Eg hadde sjølv ein fin oppvekst i Samnanger, og trur me skal få det fint der.

Det seier Jostein Steinsland Hauge, som etter nokre år i Bergen, tek med seg familien tilbake til heimkommunen.

Og det er fleire som flyttar til Samnanger. I følge tal frå statistisk sentrabyrå, kan kommunen som i år markerer 100 år som kommune skilta med ei auke i folketalet.

Mot straumen

Medan kommunane med kysten med få unntak har hatt ei kraftig vekst i talet på innbyggarar, går innbyggartalet ned i dei fleste kommunane i innlandet.

I Samnanger derimot har folketalet gått opp det siste året, stikk i strid med dei øvrige tendensane.

- At me i jubileumsåret opplever ei vekst i folketalet, må vera eit signal om at me har gjort noko riktig, seier varaordførar i Samnanger Jon Magne Bogevik.

Stabile tal 

Sjølv om innbyggartalet har svinga dei siste åra, har ein også dei siste ti åra under eit, hatt ei viss auke i innbyggartalet i kommunen. Og ein har ikkje hatt den same utviklinga som i dei andre fjord- eller innlandskommunane.

- Me har nok ein fordel når det gjeld avstanden til Bergen i høve til dei andre fjordkommunane, seier Bogevik.

Noko som underbygger nettopp dette, er at også nabokommunen Fusa òg har hatt ei viss auke i folketalet.

Optimisme

Varaordføraren har tru på at ein også i framtida skal verta fleire samningar.

- Eg har snakka med mange som seier at dei vil flytta tilbake til kommunen, dersom dei finn seg arbeid og bustadtomt her, seier han.

Nærmare familien

Jostein Steinsland Hauge har enno ikkje vorte ein del av statistikken. Men i juli flyttar han og familien på tre tilbake til Samnanger.

- Mange av kameratane mine bur i kommunen og mange har fått ungar, slik som me har. I tillegg er det ein viktig faktor at me kjem nærmare familien, seier han.

Likevel trur han at han kjem til å sakna mange av tilboda han har hatt i storbyen.

- Byen har òg sine fordelar, men byen er heller ikkje så langt unna når me flyttar heim.