Vil heller bu i hytte enn på hotell

I påska strøymde folk tidlegare til hotella på Voss og andre skibygder. No har fleire hotell og pensjonat lagt ned og tradisjonelle hotell som framleis er i drift har merka ein nedgang i påskepågangen.

– Me har mange fleire ledige rom no enn me hadde før. Tidlegare var det ventelister for å komma inn her i påska. Det er diverre ikkje slik i dag, seier sals- og marknadssjef Alette Hjelmeland ved Fleicher`s Hotel på Voss.

– Eg trur hyttekulturen i Noreg står veldig sterkt. Dei kjem gjerne her og et, så me fyller opp på påskeaftan når me har påskesupe. Men elles i påska trur eg folk trivast med menn i stillongs som står og lagar speilegg, ler Hjelmeland.

– Trend med meir «sjølvhushald»

I Myrkdalen nokre kilometer utanfor Voss sentrum er over tre milliardar blitt investert i løpet av dei siste tolv åra. Det er blitt bygd ut sju skiheisar, hytter og eit hotell.

Folk vil gjerne bu på hytte og omtrent i midt skibakken. Hotellet i Myrkdalen er heilt fullbooka og har ventelister i påskehelga.

– Det er ein veldig trend mot større grad av «sjølvhushald». Folk vel hytter og leilegheiter, det er ein veldig tydeleg trend i reiselivet. Det gjeld heile året, men særleg i påska. Folk vil bu der dei kan ski-inn og ski-ut, seier Anne Grethe Bakke, dagleg leiar Destinasjon Voss AS.

Ønskjer i større grad opplevingar

Ifølgje NHO Reiseliv er dette ei generell trend i Noreg.

– Folk har fått betre råd dei siste åra og dei har fått realisert hyttedraumane sine. Det å vera i fjellet løyste ein tidlegare ved å booka seg inn på eit hotell, men no har hytter overteke mykje av marknaden, seier Wenche Salthella, bransjesjef i NHO Reiseliv.

– Ein annan del av trendbiletet er at det i dag skal vera mykje meir opplevingar når ein ferierer. Før var det kanskje nok å bu på eit hotell, kosa seg der og kjenna på luksusen på hotellet. No skal ein oppleva mykje meir enn før, og det er ei utfordring for dei som driv i næringa, forklarer Salthella.

Store planar for Voss

På Voss er det mange planar på gang, planar som truleg vil gagna både Myrkdalen og hotella i sentrum.

Styremedlem Even Hegbom i Voss Fjellandsby AS håpar anlegget i Myrkdalen i framtida kan knytast fysisk opp mot Voss sentrum. I Vossvangen er det planar om eit nytt hotell og ei heilt ny gondolbane.

– Forhåpentlegvis vil me då ha smekkfullt hotell igjen. Me gler oss sjølvsagt veldig til det, seier Alette Hjelmeland.