Fleirtal for svensk kinokjøp i Bergen

Snart tre år etter at byrådet gjekk inn for å selja 49 av aksjane i Bergen Kino, vedtok bystyret onsdag kveld delprivatiseringa. Aksjesalet til svenske SF Kino AS for 88 millionar avsluttar dermed ein årelang kulturdebatt i vestlandshovudstaden.

Sjølv om utfallet har vore klart lenge vart debatten i bystyresalen av det intense slaget.

– Me er sterkt uroa for at dette fører til at den private deleigaren berre tenkjer profit, sa Venstre-representant Julie Andersland frå talarstolen i bystyresalen.

Venstre og resten av opposisjonen ønskjer å bruka salssummen til å oppretta eit filmfond for å styrka filmmiljøet i Bergen.

– Ikkje la desse pengane forsvinna inn i den vanlege kommunale drifta, sa Andersland.

Heller ikkje dette forslaget frå opposisjonen fekk fleirtal.

Ville utsetja saka

I eit siste forsøk på å stoppa kinosalet gjekk ein samla opposisjon inn for å utsetja saka, etter at det denne veka vart klart at den svenske kinooppkjøparen får nye eigarar.

– Eg meiner det kvilar eit stort ansvar på høgresida i dag, dette flyttar makt over kulturpolitikken vekk frå dei folkevalde organa, sa gruppeleiar for Arbeidarpartiet Harald Schjelderup, som la fram eit fellesforslag frå alle dei sju opposisjonspartia om å stoppa salet.

– Det vert gitt eit inntrykk av at privatisering er uunngåeleg. Slik er det ikkje, sa Schjelderup.

– Ingen kommunal oppgåve å selja godteri

Posisjonspartia Høgre, Framstegspartiet og Kristeleg folkeparti delar ikkje skepsisen med opposisjonen.

– Er det ei kommunal oppgåve å selja reklame og godteri, spurde leiar for finanskomiteen Norvald Visnes frå Høgre.

– Det er ingen grunn til å frykta at filmtilbodet vert dårlegare eller mindre smalt, sa Visnes.

SF Kino AS som frå før eig 43 kinoar med til saman 282 kinosalar i Sverige og Noreg, får òg forkjøpsrett til dei resterande 51 prosent av aksjane i Bergen Kino.

– Me ser ingen grunn til å stoppa det toget som startar i dag, seier Trygve Birkeland frå Kristeleg folkeparti, som samstundes minna om at kommunen beheldt aksjemajoriteten i selskapet.

– Den som trur kinodrift vil gje store overskot i framtida trur eg tar feil, sa varaordførar Tor Woldseth frå Framstegspartiet, då han argumenterte for at det er rett av kommunen å selja aksjane.

– Handlar ikkje om smågodt!

Opposisjonen fryktar at det berre vil vera eit tidsspørsmål før heile kinoen vert privatisert.

– Dette handlar ikkje om smågodt og dette er ingen hurradag for Bergen Kino. Lovnader og aksjønæravtalar er lite verd når profitten skal styra, sa Oddny Miljeteig frå SV.

– Dette er eit forslag om å løyse opp eit kommunalt monopol. Me kan effektivisa og forbetra kinodrifta med denne avtalen, sa finansbyråd Liv Røssland frå Frp, då ho avrunda debatten.

Ho er ikkje uroa for at eit familiedrive investeringsselskap har kjøpt opp SF kino AS.

– Eg trur det er bra, sa Røssland.

35 av 67 bystyrerepresentantar røysta for å selja kinoaksjane.