Juvasshytta nådde ikkje fram med klage

Det var drivarane ved Juvasshytta som klaga reguleringsplanen inn til Fylkesmannen. Klimapark 2469 vil setje opp eit eige bygg i området, og drivarane ved Juvasshytta meiner at bygningen burde vore plassert saman med dei allereie eksisterande husa på staden.

Dei klaga også på at det ikkje har vore noko synfaring på staden, og meinte fleire av dei som har handsama saka ikkje var habile.

• Byggjekonflikt ved Noregs tak

Ikkje ugyldig vedtak

Nå har Fylkesmannen i Oppland handsama saka. Dei har kort sagt kome fram til at reguleringsplanen er lovleg, og at det ikkje har vore gjort saksbehandlingsfeil.

Dei peikar på at reguleringsplanen har vore lagt ut til offentleg ettersyn fleire gonger, og meiner at lokaliseringa av bygningen er grundig drøfta.

– Byggeområdet med formål informasjonssenter ligg i eit område prega av inngrep i form av kraftline, veg og eksisterande bygningar, og det er ikkje urørt landskap ein går inn i, heiter det i Fylkesmannen si grunngjeving.

– Må sjå framover

Når det gjeld spørsmålet om inhabilitet så peikar Fylkesmannen på at både dåverande ordførar og varaordførar var med og handsama saka i kommunestyret, medan dei meinte seg inhabile da klaga vart vurdert i formannskapet.

Begge hadde sterke band til klimaparken, men Fylkesmannen meiner likevel ikkje dette gjer handsaminga i kommunestyret ugyldig.

– Eg meiner Fylkesmannen nå har slått fast at dette ikkje har vore ein skjult prosess frå kommunen si side. Nå er det viktig at vi ser framover og gjer det beste ut av eit viktig område, seier administrasjonssjef i Lom, Ola Helstad.