Stor tannlekjar-manko

I Lillehammer er det så å seie umogleg å få ein time viss du ikkje er pasient frå før.

Tannlekjar Per Glestad er uroa over utviklinga. Sjølv om innbyggjartalet har auka, har det ikkje kome fleire tannlekjarar til byen.

Den norske tannlegeforening håpar dagens studentar vil endre haldning og søkje seg ut av Oslo.

Det er ikkje få tenner tannlekjar Per Glestad har reparert i sine 20 år i Lillehammer. Og framleis står han på for å gje pasientane sine eit best mogleg tilbod.

Færre tannlekjarar

Men sjølv om folketalet i mjøsbyen berre aukar, så betyr ikkje det at Glestad har fått fleire kolleger. Tvert i mot så har det berre vorte færre tannlekjarar på Lillehammer dei siste åra. No er avtalebøkene fulle. Ingen av praksisane tek i mot nye pasientar.

Tannlekjarane tek rett nok imot pasientar i naud, men det er da og det einaste.

Innafor Ring 3 i Oslo

Det er vanskeleg å få studentar til å slå seg ned utanom dei store byane. Dessutan blir tannlekjarane som allereie finst er eldre.

Over halvparten av tannlekjarane er over 60 år, og unge tannlekjarar vil berre arbeide i Oslo-området.

Gunnar Lyngstad, president i tannlekjar-foreninga, seier mangelen kjem overraskande.

- Vi visste det var vanskeleg å få tak i tannlekjarar i Nord-Noreg, men at dette og er tilfelle i det sentrale Austlandsområde var vi ikkje klar over. Vi må ta tak i dette og eg vil ta kontakt med Oppland tannlegeforening for å sjå kva vi kan gjere, seier Lyngstad.