– Vi har gledd oss lenge til å besøke Valdres, og vi takkar for moglegheita til å møte dykk og sjå korleis det er å leve her.
Det sa kong Harald da han, saman med dronninga, i dag starta sitt besøk i Valdres i Oppland.
I løpet av tre dagar skal kongeparet besøke alle seks kommunene i regionen.
Hør Kongen takke for velkomsten:
Eventyr i fokus
I Etnedal er det "eventyrlege Valdres" som står i fokus, og med skodespel, musikk, kunst og dans viste bygdefolket fram kor eventyrleg regionen kan vere.
– Det var ein konge som heitte Harald som var her for å få seg eit eventyr med eit kvinnfolk. Han heitte Harald Hårfagre altså, det er ikkje han som er her i dag, sa eventyrforteljarane frå scena, til stor latter frå kongeparet.
Vidare vart det "avslørt" at årsaka til at Harald Hårfagre ikkje klypte håret var at han
var så forelska i Gyda frå Valdres at han bestemte seg for å la det vekse til han hadde ho på kroken. Og da han endeleg hadde gjort ho til si, tok han turen innom frisøren på Fagernes og klypte seg, heitte det i eventyret frå scena i Etnedal.
Viktig region
Heile Valdres har stått på hovudet før det store kongebesøket, og i si tale la kongen stor vekt på nettopp kor viktig det er at regionen står saman.
– Valdres er ei god merkevare, og godt samarbeid er ei forutsetning for å få dette til. Det er få andre regionar der folk er så stolte over regionen sin, sa kong Harald.
Han fortalte at han i historietimane på skulen fekk høyre at Valdres var "perlen mellom dalene".
– Og det ser ut som om historieboka har rett, her har vi sett eit flott kulturlandskap som er opparbeidd gjennom mange generasjonar med slit.