Nå blir skiløypene smalare!

- Eg har lenge irritert meg over for stor avstand mellom skispora. Det gjev manglande tyngdeoverføring og manglande fråspark. Dersom ein går smalare kjem dette på plass heilt naturleg.

Det seier skientusiasten Eirik Høyem, som nå altså vil tukle med noko av det norskaste som finst, skiløypene. På Sjusjøen får skiløparane i jula gå på ski der det er 17 centimeter mellom spora, noko som er fem centimeter mindre enn vanleg. Dette skal også prøvast ut i Oslo-marka seinare i vinter.

- Eg har faktisk tenkt over at det har vore litt breitt stundom. Eg tykte dei smale var betre, kanskje særleg for barna, seier Gry Ahlsand, som var ute og prøvde løypene i dag.

Denne videoen er dessverre ikke tilgjengelig. Kontakt oss dersom du har spørsmål.

Blanda attendemeldinger

Løypeansvarleg på Sjusjøen, Johannes Haukåssveen, seier at dei har fått mange forskjellige attendemeldinger på dei smale løypene.

- Somme er skeptiske og somme er positive, men dei fleste tenkjer ikkje over at dei er smalare. Dei største skeptikarane er dei hardaste birkebeinarane, dei tykkjer det er uvant.

For skisporten er bygd på tradisjonar, og initiativtakar for dei nye løypene, Eirik Høyem, er førebudd på å få reaksjonar frå dei som vil halde på tradisjonane.

- I dag er det nyklassisk

Han trur også at den nye sporbreidda vil gjere godt for langrennssporten.

- Det vi ser på tv i dag er noko eg vil kalle nyklassisk. Dei stakar jo berre, og går nesten ikkje diagonal. Når vi får smalare spor så vil dei starte å bruke dei store muskelgruppene som lår og seteparti, og da vil det gå fortare med diagonal enn å stake i dei slakke motbakkane.

Ti år gamle Ingvild Ahlsand har i allefall ikkje noko imot at ganglaget blir smalare når ho er ute og går på ski i framtida.

- Eg kjende ikkje så voldsom skilnad, men det gjekk fint.

Kva meiner du om at skiløypene blir smalare? Sei di meining her!