Rena Idrettslag sitt vanlegvis så flotte anlegg på Engevoll er eit trist syn i dag.
Ein bil har råkjørt på alle banene, og gjort stor skade.
- Det er djupe spor og graset er øydelagt. Det er nesten umogleg å forklare kor gale dette er, seier leiar i idrettslaget, Hans Petter Wahl Adolfsen.
20-åring har tilstått
Det er i alt 11 små fotballbaner på anlegget på Engevoll, og bilpøblane har kjørt over alle saman. Det vil ta lang tid å bøte på skadene, og banene vil truleg ikkje vere skikkeleg i orden att før neste år.
- Vi har brukt time på time for å få til dette anlegget, og da er det utruleg bittert når noko slik skjer, seier Wahl Adolfsen.
Politiet vart tidleg kopla inn i saka, og var tysdag morgon på idrettsanlegget for å sikre seg spor etter hærverket. Idrettslaget ba folk å melde frå dersom dei visste noko om saka
Og etterlysinga gav resultat. Idrettslaget fekk tips om ein parkert bil med mykje gras på, og ein 20 år gammal mann har nå tilstått at han står bak.
Han er nå sikta for skadeverk og kjøring utan førarkort.