Hytteeigarar vurderer handels- boikott etter skattekrav

- Vi rår ikkje over dei pengane dei tek frå oss, men vi rår jo over dei pengane vi har igjen. Så vi ser at det einaste virkemidlet vi har er å vurdere ein handelsboikott.

Einaste moglegheit

Det seier styreleiar i Mysuseter Vel, Hanne Toftdahl. Velforeininga vurderer å boikotte alt frå handverkarar til handelsnæring.

Ein forskingsrapport frå Østlandsforskning slår fast at ei gjennomsnittleg hytte i Innlandet gir ein lokal omsetnad i hyttekommunen på mellom 13.000 og 14.000 kroner.

- Det er det einaste vi sitt att med av moglegheiter, dessverre, seier Toftdahl.

Har ikkje råd

- Kvifor reagerer de så sterkt på å måtte betale eigedomsskatt?

- Vi reagerer fordi nivået er høgt, det er mykje pengar dei skal ha frå oss.
Dei foreslår at seks millionar kroner i skatteinntekter skal betalast av 2000 hytter. Samstundes vil dei redusere nivået på eigedomsskatten for dei som betaler slik skatt allereie, og det betyr at dei skal ta enda meir frå hyttene. Og det reagerer vi på. Dette er mykje pengar, seier Hanne Toftdahl.

Ho trur at mange hytteeigarar ikkje har råd til å betale eigedomsskatt.

- Mange av hytteeigarane på Mysuseter er pensjonistar og vi trur at det kan bli vanskeleg for mange av dei å betale denne skatten.

Vil ha maksgrense

Velforeininga har bede kommunen om at det må bli mogleg for minstepensjonistar å søke fritak for skatteplikta.

- I møte med ordføraren har vi også bede om ei maksgrense på 10.000 kroner per hytteiegar. Men det ser ikkje ut til at vi møter noko forståing for det.