- Stugguklokka slår eit ekstra slag

- Det klirrar i kjøkenskåpa, bileta fløt seg på veggen og stuguklokka slår ekstra slag.

Slik skildrar Arild Pedersen tilstandane når Forsvaret skyt med kanoner på Terningmoen. Han bur nokre hundre meter utanfor gjerdet til militærleiren i Elverum.

- Eg har målt støyverdiar på 106 decibel ute på troppa mi, fortel han.

- Ingen restriksjonar

Stabsjef i Østerdal garnison, Ola Gundersen, meiner øvinga dei siste vekene ikkje var uvanleg, og seier at det vil bli meir skyting med kanoner utover hausten.

- Det har vore skyting med det vi kallar 84 mm rekylfri kanon. Den er noko støyande, særleg høyrer ein det godt på denne tida av året med lauvfall og med det véret vi har hatt.

Han seier at dei ikkje har pålegg om å flytte øvingar med tyngre skyts utanfor Terningmoen, og det finst ingen avgrensingar for aktiviteten i militærleiren.

- Vi prøver å leggje mesteparten av den tunge skytinga utanfor Terningmoen, fyrst og fremst til regionfelt østlandet. Men det er ikkje fullt ferdig og derfor må vi stundom gjennomføre slik aktivitet på Terningmoen.

Kan kome reglar

Det kan likevel vere håp om betring for skotleie naboar. Forsvarsbygg vurderer nå støyen ved alle skytefelta i landet, og kan leggje konsesjonar til verksemda. Dei skal levere ei utgreiing til forsvarsdepartementet innan utgangen av året.

- Vi har i fleire år sett at det manglar ein konsesjon for Terningmoen, og det vil bli teke høgde for i vår utgreiing, seier Jens Levi Molstad i Forsvarsbygg Øst.

Nabo Arild Pedersen meiner Elverum har eit by-skytefelt, og er ikkje trygg på at dei nye utgreiingane vil hjelpe.

- Denne konsesjonsprosessen må gå opent, og folk som har greie på støy må bli høyrt. Dersom ikkje er eg redd det ikkje vil kome tiltak som monnar.