Ein av dei fem mennene som er sikta for ulovleg bjørnejakt i Trysil i sommar, har i politiavhøyr innrømma at det var han som skaut.
De fem tryslingane har stort sett forklart seg likt om kva som skjedde den natta bjørnen fall, seier miljøkoordinator Knut Norman Mælen hos politiet i Hedmark.
Brukte laushundar
Politiet har nå skaffa seg eit godt bilde av kva som skjedde den natta bjørnen vart skoten, natt til onsdag 12.juni i sommar.
Den 33 år gamle jegeren som er hovudmannen i saka, var den natta saman med fleire kjenningar ute i skogen ved Ørsjøsetra nord for Innbygda. Mennene sleppte der to laushundar som tok ut ein bjørn og deretter gjekk i los på den.
Tre skoleelevar på overnattingstur i området fekk sjå både bjørnen og laushundane koma løpande. Seinare høyrde dei også skogen som felte bjørnen.
Gjennombrot
Etter lengre etterforskning fekk politiet gjennombrot i saka for to veker sidan. Dei fem tryslingane vart arresterte og sikta for anten å ha skote bjørnen, fjerna kadaveret eller å ha medverka til noko av dette.
Bjørnekadaveret er ennå ikkje funne, men slik etterforskinga har utvikla seg, er det heller ikkje nødvendig for å oppklare saka, seier miljøkoordinator Knut Norman Mælen.
