Førstelektor ved høgskulen i Oslo og Akershus, Heid Osnes og høgskulelektor Hilde Nancy Skaug har saman med deltidsstudentar ved barnehagelærarutdanninga på Høgskulen kartlagt aktivitetsnivået til born i over 200 ulike barnehagar i Oslo-området.
– Vi finn ikkje nokon skilnad på intensiteten i det vi kallar kroppsleg vilter leik inne i barnehagen og på uteleikeplassen, seier Osnes.
– For lite areal
Landskapsarkitekt Askild Nilsen, seier det er vanskeleg å lage gode nok uteleikeplassar når det ikkje er krav til areal på leikeplassane.
– Vi har ikkje reglar for kort stort leikearealet i barnehagane skal vere. Bilen skal ha plass, søpla skal ha plass og brannbilen skal kome fram - men det er ingen krav til kor mykje areal borna skal ha å boltre seg på ute.
Liten variasjon på uteleikeplassane
– Ein uteleikeplass kan fort bli veldig stasjonær og lite spanande for borna. Den gir ikkje nok utfordringar og blir kanskje til og med litt keisam, meiner Osnes.
Undersøkinga viser at 70 prosent av aktiviteten til borna ute i naturen har høg eller moderat intensitet, medan berre 40 prosent av aktiviteten inne og ute på leikeplassen har det same.
– Viktig at dei vaksne involverer seg
Forskinga syner også at borna er meir aktive når dei vaksne involverer seg i leiken, noko dei vaksne ikkje gjer i like stor grad ute på leikeplassen som ute i naturen.
– Når borna skal ha såkalla "frileik" ute, så avviklar dei vaksne møter og tar matpausane sine. Ut i frå det våre deltidsstudentar rapporterar, er det ikkje ofte at det er eit pedagogisk opplegg knytta til kroppsleg leik på uteleikeplassen, seier Osnes.
– Barnehageborna får nok aktivitet
Osnes meiner det ser ut til at leik i natur i størst grad bidreg til å oppfylle Helsedirektoratets anbefalingar om høgt til moderat aktivitetsnivå.
Avdelingsdirektør for miljø og helse i Helsedirektoratet, Jakob Linhave meiner barnehageborna likevel bevegar seg nok samanlikna med born i andre aldrar.
– Vi meiner at dei yngste borna er dei som får mest aktivitet, når ein samanliknar med andre aldersgrupper. Tendensen er at born blir mindre aktive kor eldre dei blir, så det er viktig å legge eit godt grunnlag i barnehagealder og ha fokus på fysisk aktivitet der, seier Linhave.