Eit nytt torskeeventyr frå Noreg er på god veg ut i den store verda. Etter strevsame forsøk i fleire år, er oppdrettsbransjen på god veg til å ale fram eit nytt produkt ein tener pengar på. Fersk oppdrettstorsk er nemleg i skotet som aldri før. I fjor auka eksporten med 20 prosent.
Ikkje nok yngel
- Vi har ordrebøkene fulle for heile 2008.
Børge Søraas er dagleg leiar i Atlantic Cod Juveniles i Rissa i Sør-Trøndelag. Yngelanlegget aler fram torsk før den går vidare til eit settefiskanlegg. Selskapet er ein del at Atlantic Cod Farms, eit av 100 selskap som satsar på torsk i Noreg.
- Det er slik i Noreg i dag at det er underleveranse av yngel. Det er mange som vil satse
- Kva tyder det på?
- Torsk er populært. Utan tvil.
Tener pengar
For tida står det rundt seks millionar kroner i rein verdi i anlegget i Rissa. Kiloprisen på det endelege produktet har og vore svært god den siste tida.
- To gongar i fjor var kiloprisen på ferdig filet over hundre kroner. Det er ny rekord, seier kvalitetssjef for kvitfisk i Eksportutvalet for fisk Tove Sleipnes.
- Vi ser ein er villige til å betale for dette. Godt produkt gjev gode prisar. England er for tida den største marknaden for oppdrettstorsken, men og dei største landa i Europa byrjar å få auga opp for dette produktet.
Året rundt
Trumfkortet oppdrettarane har er leveranse. Medan den ville torsken gyter på nyåret og utover våren, kan fersk oppdrettstorsk leverast året rundt.
- Det er ein fin balanse dette, mellom det tradisjonelle fiskeriet og oppdrettarane, hevdar direktør i oppdrettsorganisasjonen FHL, Geir Ove Ystmark
- At Noreg kan levere fersk torsk 365 dagar i året, gjer Noreg enno meir attraktiv som fiskerinasjon, trur Tove Sleipnes.
Med auka etterspurnad er det og ønskje om fleire i bransjen i følgje FHL.
- Det er eit stort potensiale i oppdrettstorsken. Vi har både områder som er tilgjengelege, samt at det ikkje er noko tak på konsesjonar i dag. Kven som helst kan i prinsippet starte, inviterer Geir Ove Ystmark.