Mattilsynet gjennomførte tilsyn ved 1039 serveringsstader i heile landet i november og desember 2007. Tilsynet fann kritikkverdige tilhøve ved 47 prosent av verksemdene.
Dei fleste av manglane er knyta til personleg hygiene, orden og reinhald.
- Det er urovekkjande at det enkelte stader ikkje eksisterar interne rutinar for reinhald i det heile tatt, seier Atle Wold som er sjef i seksjon for omsetjing til forbrukar.
Vaskar ikkje hendene
Observasjonane til Mattilsynet viser at folk er generelt dårlege til å bruke såpevatn og tørkehandklede etter å vore på do.
- Mangel på handvask går igjen mange stader. Folk går rett frå toalettet til matlaging utan å vaske seg. Det er slettes ikkje bra, seier Wold.
Kritikkverdig oppbevaring av kjølevarer går også igjen blant ei rekkje av verksemdene.
- Fleire serveringsstader er dårleg til å sikre seg mot høg temperatur der det skal vere kaldt, fortel Wold.
Overraska
Mattilsynet er overraska over at så mange verksemder slurvar.
- Kampanjen var omtalt på førehand både til bransjeorganisasjonane og i media. I tillegg vart det gjennomført ein stor aksjon mot serveringsstader i 2006. Derfor er det overraskande og urovekkjande at så mange ikkje tek tryggleiken rundt matlaging på alvor, seier rådgjevar Ellen Christine Sjølie i Mattilsynet.
Verst står det til i Nordland. Mattilsynet fann avvik ved 67 prosent av dei 73 kontrollerte verksemdene. Rogaland, Agder, Buskerud, Telemark og Vestfold kjem best ut. Her fann Mattilsynet avvik ved 34 prosent av serveringsstadene.