På Norsk Polarinstitutt sin forskingsstasjon på Zeppelin-fjellet, 474 meter over havet, blir det fortløpande samla inn data som viser mengda av klimagassar i atmosfæren.
Arbeidet på stasjonen skjer i tett samarbeid med Norsk institutt for luftforskning og Stockholms universitetet. Stasjonen er den einaste i sitt slag her i landet.
- No i desember er vi komne opp i 390 ppm, og så høg konsentrasjon av CO2 er aldri blitt målt før her på stasjonen, seier forskingsdirektør Kim Holmén ved Norsk Polarinstitutt.
NETT-TV:
Mykje større enn venta
Ppm er ei måleeining som viser milliondelar per volum-eining. For 20 år sidan låg CO2-nivået på 360 ppm på det høgste. Auken er altså på omlagt åtte prosent.
I førindustriell tid var nivået rundt 290 ppm. CO2-konsentrasjonen har dermed auka med vel ein tredel frå den gongen. 390 ppm tilsvarar ein CO2-konsentrasjon på 0,039 volumprosent.
- CO2-utsleppa i verda aukar raskt, og her på Zeppelin-fjellet ser vi altså effekten utsleppa har for atmosfæren. Auken i CO2-konsentrasjon er mykje større enn vi har venta, seier Holmén.
- Kor alvorleg er dette?
- Det er veldig dramatisk, for det viser at vi kanskje undervurderer kor store forandringar menneska kjem til å forårsake dei næraste tiåra, seier Holmén.
Auken tydeleg
Målingane på Zeppelin-stasjonen viser at det også blir meir av andre klimagassar i atmosfæren - men det er CO2-mengda som aukar mest.
Konsentrasjonen av CO2 varierer gjennom året - minst om sommaren, mest om vinteren. Men auken er tydeleg - og den går raskare enn før, ifølgje målingane, som blir utførte av Stockholms universitet.
Det er vanskeleg å vite nøyaktig kvar CO2-en som blir målt her kjem frå, men utsleppa er som kjent store både i USA, Nord-Europa, Russland og Asia, mellom anna frå biltrafikken, olje- og gassproduksjon og frå kolkraftverka.
- Dei store endringane vi har sett i klimaet dei siste åra viser kor viktig det er å følgje nøye med. Det er viktig å styrkje forskninga på dette feltet framover, seier Kim Holmén.