– Vi kan ikkje ha det slik at hovudfartsåra gjennom Agder endar opp med å bli stengt fordi vi har vogntog som er for dårleg skodde, seier operasjonsleiar i Agder-politiet, Ingrid Mæhre til NRK.
Det var eit utanlandsk vogntog som snurra rundt og førte til at E18 i Tvedestrand var stengt i nesten tre timar torsdag kveld.
Vegvesenet fryktar dårlege dekk
No mobiliserer politiet saman med Statens vegvesen for å luke ut vogntog som har for dårlege dekk.
Alle vogntog som kjem i land med danskebåten i Kristiansand klokka 24 blir kontrollert. Det er kring 20 vogntog med båten.
– Vi skal kontrollere om dei har riktig dekk og om dei har med kjetting, seier områdeleiar i Statens vegvesen Terje Bekker.
– Vi fryktar at dei har feil dekk og at dei ikkje er godt nok skodde. Nokre plar også å vere feil lasta. Vi vil jo ikkje ha dei på vegane våre i dårleg stand. Då vert dei ståande i næraste bakke. I tillegg kan det vere trafikkfarleg, seier Bekker.
Kan få køyreforbod
På Stoa i Arendal vil alle vogntog som køyrer austover på E18 bli sjekka.
I Telemark vil alle vogntog som køyrer vestover på E18 bli kontrollerte.
– Dei som ikkje er godt nok skodde vil få køyreforbod. Vi må gjere det vi kan for å forhindre at vegane vert stengde, seier Mæhre.
– Det er ikkje alle vi greier å få tak i, for det er fort gjort at nokon kjem utanom, seier han.
VIDEO: E18 var stengt i Telemark på grunn av vogntog som stod fast.
