Nuoraidráđđi lea válljen dán fáttá, ja Camilla Mudenia muitala ahte dát lea hui dehálaš ášši.

– Nuorat eai dieđe nu olu, sii gáddet ahte dáppe Deanus ja Unjárggas ii dáhpáhuva nu olu veahkaválddálašvuohta. Muhto lea viehka olu, dan ektui maidsii jáhkket, muitala Camilla.

Olusat vásihit dan

2-4% álbmogis vásihit veahkaválddálašvuođa ruovttus. Dát mearkkaša sullii 120 Deanu olbmo ja 30 Unjárgga olbmo, muitalii Ingebjørg Hansen, guhte lea Nora-Sentera birasterapevta Girkonjárggas.

– Lea hui dehálaš ahte mii čalmmustahttit mii veahkaválddálašvuohta lea, nu ahte olbmot dihtet goas ferte muitalit dan earáide. Lea dehálaš ahte dain, geain dilli lea ná, oidnet ahte lea vejolaš veahki oažžut, muitala Hansen.

• Loga maid: – Vi er drittlei narko!

Veahkaválddálašvuohta sáhttá váikkuhit mánáide ja nuoraide dainnalágiin ahte ballu sáhttá givssidišgoahtit sin, sii sáhttet doallagoahtit iežaset sierra, dahje sáhttet maid rassagoahtit mirkkuiguin dahje alkoholain, muitala Hansen.

Olusat čoahkkanan

Deanu lášmmohallanhálla lea dievva, ja olusat leat čájehan beroštumi. Mannan jagi stuorračoahkkin menestuvai hui bures, ja dasa lei hui stuorra beroštupmi. Politiija Britt Elin Hætta Isaksen doaivu ahte šaddá seammá buorre dán jagi.

- Dáppe leat hui olu nuorat, váhnemat ja leat maiddái boahtán eará berošteaddjit. Dát lea dakkár fáddá, man birra lea váttis hupmat. Mii háliidit ahte nuorat duostagohtet hupmat dan birra, ja ahte váhnemat ieža humadit iežaset nuoraiguin dán birra, muitala Isaksen.

Camilla orru leamen hui duhtavaš dán jagi stuorračoahkkimiin, ja lea ieš oahppan hui olu.

• Loga maid: Etterlyser mer kompetanse om familievold

– Lean oahpan mo sáhttá geavvat, ja maid sáhttá bargat jus dieđát ovttage du birrasis, gii vásiha dan dahje jos ieš vásiha dan, lohká Camilla.

Ráppenjoavku muitalii

Ráppenjoavkku Tonna Brix doalai maid logaldallama stuorračoahkkimis. Kenneth Holt ja Hakan Pandul muitaleigga iežaska bajásšaddama birra. Soai muitaleigga ahte psyhkalaš veahkaválddálašvuohta lea maiddái veahkaválddálašvuohta. Dat ii dárbbaš álo mearkkašit huškuma ja cikcuma, muhto olmmoš sáhttá njeidojuvvot maiddái psykalaččat. Soai muitaleigga maid ahte dat mii veahkeha, lea hállat dan birra. Go leigga muitalan iežaska birra, de doalaiga unna konsearttaža, mas soai ráppiiga veahkaválddálašvuođa birra.