Ollugat oaivvildit ahte geasseluomus galggašii njálgga biepmu borrat, vuoiŋŋastit ja návddašit beaivváža.

Máŋggas ges ballet ahte dehkiid maid leat hárjehallan olles dálvvi láhppojit jus ii šatta hárjehallat moatti vahkkui.

Man guhká son dat sáhttá hárjehallanbottu váldit ovdalgo deahkit unnugohtet?

Golbma vahkku

Camilla Hoel gii lea doaimmaheaddji Fitnessbloggen.no neahttabáikkis, ja geas lea masteroahppu molekylabiologiijas muitala ahte ii mana go moadde vahkku ovdalgo dovdu ahte deahkit unnugohtet.

– Ii dat vávjje das nu ollu ovdalgo lea golbma vahku vássán jus muđuid leat aktiiva.

– Muhto jus it beasa hárjehallat ovdamearkka dihtii go leat doadján gieđa dahje juolggi, de gal vávjját ahte deahkit unnot ollu moatti vahkus, muitala son.

Sáhttet go deahkit šaddat buoidin?

Leat várra gullan muhtin olbmuid muitaleamen ahte go heaittát hárjehallamin de šaddet deahkit buoidin du rupmašii, muhto leago dat doahta?

Hoel vástida oanehaččat ahte deahkit eai šatta buoidin!

– Jus heaittát hárjehallat de unnugohtet deahkit maid áiggi mielde leat huksen. Dat unnot dan dihtii go eai geavahuvvo ja eaige devdo čáziin ja glykogenain seammá láhkái go dalle go loktet ruvdii.

Sturrodagas it vávje ollu erohusa

Jus leat smiehttan geahpidit hárjehallama geasset de berret liikká unnimusat oktii vahkkui ruvddiid loktet amas láhppigoahtit dehkiid, ávžžuha Hoel.

– Jus válddát hárjehallanbottu moadde vahku it don vávjje nu ollu erohusa dehkiid sturrodagas, muhto it don leat šat seammá gievra gal, muitala Hoel.