Deanus lea skuvllahistorjjálaš dáhpáhus geavvan. Dán jagi lea Deanu sámeskuvla doaibman logi jagi.

Ráhkadii reporáša iežas skuvllas
Lea logi jagi áigi dassá go Deanu sámeskuvla ásahuvvui Deanušaldái. Dat mearkkaša ahte dán giđđagease gerge vuosttaš oahppit, geat leat vuođđoskuvlla logi jagi vázzán sámeskuvllas. Dá duvle lei Ella Marie Hætta, Deanu sámeskuvlla ovccát luohká oahppi oahpahallin ja reportárin NRK Sámis. Son lea geavahan vejolašvuođa ráhkadit reportáša iežas skuvllas, justa fal dán logi-jagi-ávvudeami birra.

Ella Marie jearahalai logát luohká oahppi Aina Helene Guttorm Einarsena, gii muitá bures iežas vuosttaš skuvlabeaivvi, mii lei čakčat, logi jagi dás ovdal.

–Mun muittán hui bures iežan vuosttaš beaivvi skuvllas, mu mielas skuvla lei nu hirbmat fiinnis! Mun ledjen fitnan Buolbmát skuvllas geahččamin mo doppe lei, ja ledjen oalle ilus ahte in dárbbašan dohko álgit. Dat lei nu boaris ja ii nu fiinnis go sámeskuvla, lea buorre ahte lean beassan dáppe vázzit.

Go Aina lei mánáidgárddis, de muitá ahte sii lávejedje vázzit olggobealde go sii huksejedje sámeskuvlla. –Muittán ahte ádjánedje oalle guhká, muhto illodin.

Ávkin mánáide ja nuoraide
Maid lea Deanu sámeskuvla bargan odná Deanu servodahkii ja nuoraide buorrin?
Sámeskuvla lea leamaš sámegiela ja kultuvrra nannejeaddji ja ovdánahtti ja identitehta huksejeaddji. – Dat lea maiddái leamaš ávkin ollu mánáide ja nuoraide. Nu mo mii diehtit, de leat maiddái dárogielat bearrašiid mánát álgán dán skuvlii, ja dáppe oahppan sámegiela, lohká Janoš Trosten, gii lea oahpaheaddjin skuvllas.

Dá beasat gullat ovccát luohkkálačča Ella Marie Hætta reportáša Deanu sámeskuvlla birra:

Aina Helene Guttorm Einarsen ii jáhke sus livčče seamma nanus sámegiella jus ii livčče Sámeskuvlla vázzán. -Ja ahte mus lea sámegiella birrasis, danne lean hui ilus ahte mis lea sámeskuvla.