– Våre tankar går til alle dei som i dag har motteke den tunge bodskapen om at dei har mista ein som står dei nær. Dei som kjenner uro, sakn og smerte i dag skal vite at de ikkje er åleine i sorga, sa Erna Solberg på ein pressekonferanse i ettermiddag.
- LES:
- LES:
Ifølgje statsministeren er det lenge sidan ei så alvorleg ulykke har råka norsk olje- og gassnæring. Ho sender også sine tankar til dei som jobbar på norsk sokkel, som har mista vener og kollegaer.
– Det er ein tung dag for alle som jobbar i olje- og gassindustrien i Norge, og for heile det norske samfunnet, sa Solberg
Redningsaksjonen er avslutta
Helikopteret på veg frå Gullfaks-feltet styrta ved Turøy i Hordaland. Hovudredningssentralen fekk den første meldinga om havariet klokka 12.01.
13 personar var om bord. Politiet går no ut frå at alle omkom i styrten. 11 er så langt funne. Søket etter dei to siste held fram.
Det var elleve nordmenn om bord, ein brite og ein italienar.
Har følgt situasjonen
Statsministeren har i ettermiddag følgt redningsarbeidet etter helikopterstyrten.
– Eg har snakka med leiinga i Statoil og uttrykt mi sorg og medkjensle. Eg har i tillegg blitt oppdatert på situasjonen. Naudetatane og ei rekke ressursar var raskt på staden, og eg vil takke alle som har bidrege i redningsarbeidet i ettermiddag.
Statsministeren hadde allereie planlagt ei reise til Bergen i dag, og vil vurdere om ho skal besøke ulykkesstaden og snakke med pårørende.
– Må få vite årsaka
No vil regjeringa vente på funna frå Havarikommisjonen. I mellomtida ser ikkje statsministeren nokon grunn til å ta nye initiativ som endrar regelverket.
– Vi må først få vite kva som er årsaka til ulykka. Det vil vere viktig å gå gjennom helikoptera og sikre at det ikkje er ein systemfeil her. Dersom det blir avdekka at årsaka kunne vore hinda med andre kontrollar og sjekkar, vil det påvirke regelverket.
– Kva vil du sei til alle dei som jobbar i olje- og gassindustrien i dag?
– Vi har stor medkjensle med alle dei som har mista nokon, men også med dei som jobbar i olje- og gassnæringa. No skal vi finne ut årsaka til at dette har skjedd. Liv og tryggleik har vore høgt prioritert i norsk olje- og gassindustri i alle år, og det skal det framleis vere.