I kveld blei det kjent at i Moss Lufthavn Rygge blir lagt ned. Det har styret ved flyplassen bestemt.
På Facebook-sida presiserer statsministeren at ingen norske flyplassar blir lagt ned på grunn av ei avgift på flyreiser.
– I dette konkrete tilfellet dreier det seg om at Ryanair ikkje ønskjer å nytte seg av lufthamna på Rygge, angivelig på grunn av den nye avgifta – ei avgift som dessutan ikkje ser ut til å hindre Ryanair i å fly til andre flyplassar i Norge, skriv Solberg.
Og ho stoppar ikkje der.
– Det er beklageleg at den aktuelle lufthamna synes å vere såpass avhengig av ein enkeltaktør, som ved gjentatte høve har vist seg å utøve press mot styresmakter, politikk og forvaltning rundt omkring i Europa for å sleppe unna skattar og avgifter.
Opnar for omkamp
Medan statsminister Erna Solberg er krystallklar på at regjeringa ikkje vil la seg presse av Ryan Air, vil Kristeleg Folkeparti gjere det til ei sak i dei reviderte forhandlingane til statsbudsjettet.
– Eg beklagar det vedtaket som styret i Rygge sivile lufthamn har gjort, seier stortingsrepresentant Line Henriette Hjemdal til NTB.
Ho fortel at ho dagleg pendlar forbi flyplassen på Rygge, og føler med dei som kan miste jobben.
– Eg vil ikkje sjå bort frå at styrevedtaket kan bli tema i forhandlingane. KrF har tatt på alvor det som er kome fram i høyringa om avgifta. Vi har fått konsekvensane, og då må vi lytte og gjere endringar. Men det er også slik at alle avtalepartnarane må vere einige.
Ryan Air orienterte finansminister Siv Jensen
Ryan Air vil ikkje kommentere at flyplassen no vert lagt ned. Kommunikasjonsrådgjevar Hans-Jørgen Elnæs seier til NRK at selskapet har sagt det dei vil sei om saka til norsk presse.
– Vi har ingen kommentarar til dette. Vi har synleggjort vårt standpunkt overfor media i Norge tidlegare, og utover det har vi ingenting å legge til, seier Elnæs til NRK.
Like før jul i fjor besøkte han finansminister Siv Jensen saman med kommersiell direktør i Ryan Air, David O'Brien. Då varsla selskapet at dei ville legge ned basen og halvere trafikken til Rygge om det ikkje vart endring i den planlagde flyseteavgifta.
Katastrofe
– Det er ein katastrofe for Moss-regionen og Østfold at rundt tusen menneske kan miste jobben som ein konsekvens av at regjeringa har valt å gjennomføre flypassasjeravgifta, trass i at dei har vore klare over konsekvensane, seier Geir Pollestad (Sp).
Han er leiar i næringskomiteen på Stortinget og sterkt kritisk til avgifta regjeringa og samarbeidspartia nå innfører.
Også Orkla, som eig 40 prosent av Rygge sivile lufthamn, beklagar utviklinga til flyplassen, skriv NTB.