Hopp til innhold

Janne Kristiansen: – Breivik er ikkje direkte høgreekstremist

– Anders Behring Breivik er ikkje direkte høgreekstremist, seier tidlegare PST-sjef Janne Kristiansen. Dette reagerer Venstre-leiar Trine Skei Grande sterkt på.

Janne Kristiansen og Trine Skei Grande

SKREMT: Trine Skei Grande (innfelt) er skremt av at tidlegare PST-sjef Janne Kristiansen nedvurderer den høgreekstreme trugselen i Noreg.

Foto: Kallestad, Gorm / NTB scanpix

Tidlegare PST-sjef Janne Kristiansen gjekk langt i å nedvurdere den høgreekstreme trugselen i Noreg under 22. juli-høyringa på Stortinget måndag.

Så langt at ho ikkje vil kalle terroristen Anders Behring Breivik for høgreekstrem.

– Han er ein soloterrorist

Janne Kristiansen

ORDNA OPP: Janne Kristian forklarte at hennar forgjengar i PST, Jørn Holme, hadde stort sett fått bukt med den høgreekstreme trugselen.

Foto: Kallestad, Gorm / NTB scanpix

– Dersom ein snakkar om Breivik er ikkje han ein direkte høgreekstremist, han er ein soloterrorist, forklarte tidlegare PST-sjef Janne Kristiansen.

LES OGSÅ: Kristiansen: – PSTs vurderinger var korrekte

Dette beit Venstre-leiar Trine Skei Grande seg merke i.

– Eg er skremt av at Kristiansen framleis ikkje innrømmer at terror frå høgreekstreme er eit problem, seier ho, og reagerer på at Kristiansen ikkje kallar Breivik for høgreekstrem.

– Når PST seier vi ikkje kjem til å møte høgreekstreme trugslar, så vel ho å berre omdefinere Breivik til å ikkje vere høgreekstrem, seier ho.

– Dette er i så fall ein heilt ny definisjon som eg ikkje har høyrt andre operere med.

LES OGSÅ: Holme: PST blei halden utanfor

– Ingen kjenner ideologien hans

For å underbygge påstanden sin seier Janne Kristiansen at ingen eigentleg veit kva Anders Behring Breivik står for.

Janne Kristiansen

FORKLARTE SEG: Tidlegare PST-sjef Janne Kristiansen og Jørn Holme svarte for seg under høyringa i Stortingets kontroll- og konstitusjonskomite om 22. juli-rapporten.

Foto: Kallestad, Gorm / NTB scanpix

– Han (Behring Breivik) har sin eigen ideologi som ingen av oss eigentleg heilt kjenner, heldt ho fram.

Også dette meiner Trine Skei Grande er feil.

– Det veit vi veldig godt, han har skrive eit heilt manifest om det, seier Skei Grande som ikkje er betrygga over det som kom fram i dag.

LES OGSÅ: Anklager Forsvaret for å være veike

Då Janne Kristiansen måtte svare til Kontroll- og konstitusjonskomiteen på Stortinget måndag ettermiddag, forklarte ho at under hennar tid i PST var den høgreekstreme trugselen så godt som utrydda under forgjengaren hennar.

– Holme fekk bukt med høgreekstreme grupper

Ho meinte den høgreekstreme trugselen var nærast avverja under forgjengaren Jørn Holme si tid som PST-sjef, og at det difor var rett å ikkje fokusere på dette.

– Eg vil seie at Holme etterlét eit PST som hadde fått meir eller mindre bukt med høgreekstreme grupper slik som vi såg det, der det ikkje var nokre klare leiarar, seier Kristiansen, og viser til PST si trugselvurdering der ekstrem islamisme er topp-prioritet for PST.

LES OGSÅ: Beredskapsdirektør: Norge er ikke klar for et nytt terrorangrep

– Høgreekstremisme var ein prioritet som Holme sitt regime hadde klart å få bukt med slik vi såg det, seier ho.

– Hadde vore skremt om ho var PST-sjef i dag

Også dette meiner Trine Skei Grande er hårreisande.

– Holme gjorde ein god jobb i å stoppe høgreekstreme. Men å dra konklusjonen om at det no er ordna opp, håpar eg ikkje den nye sjefen delar oppfatninga av.

– I dag har vi eit trugselbilete frå mange ekstreme retningar, og det er viktig at vi har PST-sjefar som har ei forståing for at det ikkje berre er islamistar som er ein trugsel for Noreg, seier Grande.

– Dersom Janne Kristiansen hadde heldt fram som PST-sjef hadde eg vore skremt i dag.

– Holme: Høgreekstremisme var ikkje ufarleggjort

Då Trine Skei Grande spurte Jørn Holme om han delte Kristiansen si oppfatning av at han hadde eliminert den høgreekstreme trugselen som PST-sjef, svarte han:

– Ikkje i det heile teke.

– Det var riktig som Kristiansen seier at dei gruppene vi hadde hatt fokus på, var utan leiarskap då eg gjekk av i 2009, seier Holme. Men ifølgje han betyr ikkje dette at høgreekstreme miljø eller enkeltpersonar var ufarleggjorde.

Han understrekar at det han kallar ustabile ekstremistar som ikkje var islamistar framleis utgjorde ein stor trugsel, spesielt mot norske muslimar.

AKTUELT NÅ