Det skriv Brønnøysund Avis.
Gruppa vart starta då Idrettsstyret sa nei til eit OL i Tromsø, og har i skrivande stund over 900 medlemmar.
Djupare kløft mellom nord og sør
Grunnleggjar Håkon Andre Winther meinar gapet mellom nord og sør har vorte djupare etter at OL-draumen brast.
- Eg starta gruppa i rein frustrasjon. Det som fekk begeret til å renne over var måten Idrettsstyret sa nei til OL på, seier Winther til NRK Nordland.
Han meinar ein nord-norsk stat vil vere levedyktig.
- Nord-Noreg har mange ressursar både i havet og på land. Men i dag vert desse ressursane forvalta i Sør-Noreg. Eg meinar me må sjå på kva me får igjen for dette, seier Winther.
Han seier vidare at Nord-Noreg er sett tilbake om ein ser på fordelinga av ressursar mellom nord og sør.
- Det er ikkje tvil om at Nord-Noreg er sett tilbake i forhold til Sør-Noreg. Me tapar når godene skal fordelast, seier Winther.
Folk er provoserte
Winther merkar på tilbakemeldingane han har fått at folk byrjar å verte provoserte over måten Nord-Noreg vert behandla.
- Folk er leie og ynskjer at det skal satsast i nord. Responsen har vore formidabel. Det har skote i veret dei fire dagane gruppa har eksistert, fortel Winther.
Motpol til Sør-Noreg
Winther ynskjer å opne augene til folk og skape debatt.
- Ein kan kalle det eit forsøk på å skape ein motpol til Sør-Noreg. Eg trur ikkje ei Facebook-gruppe kan skape ein ny stat, men eg håpar at det kan skape ein debatt rundt nord-sør kløfta, seier Winther.