Administrasjonen i Helse Midt-Noreg foreslår å legge ned AMK-sentralen i Molde. Det inneber samtidig ei styrking av sentralen i Ålesund. Også AMK-sentralen i Namsos blir lagt ned.
– Vi har sett at det er ein fordel og ei styrking av den faglege kvaliteten å knytte AMK-sentralane til dei største akutt-medisinske miljøa i regionen. Desse miljøa finn vi ved Ålesund sjukehus og ved St.Olavs hospital i Trondheim, seier fagdirektør i Helse Midt-Noreg, Henrik Sandbu.
Vil ha berre ein AMK-sentral
Frå i sommar blir Helse Nordmøre og Romsdal og Helse Sunnmøre slått saman til eitt helseforetak. Dette har vore eitt av forholda som ligg bak innstillinga om å legge ned AMK-sentralen i Molde.
– Vi ønskjer ei kvalitativ heving på støttefunksjonane omkring AMK-funksjonen. I tillegg veit vi at foretaka i Møre og Romsdal blir slått saman til eitt foretak. Og vi ser det ikkje som naturleg at der er to AMK-sentralar i same helseforetak, seier Sandbu.
– Sparkar folk som ligg nede
Forslaget om å legge ned AMK-sentralen møter skarp motstand i Molde. Der dreg dei no linene tilbake til tida før jul, då dei fekk beskjed om at bygginga av nytt sjukehus i Molde er sett på vent.
– Dette er kjempealvorleg. AMK-sentralen er hjarta i sjukehuset. Å misse dette får følgjer på sikt, seier tillitsvald Knut Ivar Egset.
– Er du overraska over forslaget?
– Nei, eg trudde ikkje dette kom til å skje. Tilsette ved sjukehuset i Molde ligg langt nede etter beskjedenhelseministeren gav oss i desember. Vi brukar no store ressursar på å motivere dei tilsette. Det forundrar meg at Helse Midt-Noreg no vil sparke nokon som allereie ligg nede, seier Egset.
– Vi misser noko heile tida
Også sjukepleiarforbundet i Molde reagerer på forslaget frå Helse Midt-Noreg. Dei meiner at helseregionen handlar planlaust.
– Dei gjer dette utan å ha ein heilskapleg plan. Dei vil fjerne noko utan samtidig å tilføre noko anna. Vi sit heile tida med eit inntrykk av at vi berre misser noko, seier tillitsvald i sjukepleiarforbundet, Tor Rune Aarø.
No skal forslaget behandlast i styret i Helse Midt-Noreg. Det er ikkje sikkert at forslaget blir vedteke.
– Det blir heilt sikkert ein heftig diskusjon i styret. Dette er eit omstridd emne også i styret i Helse Midt-Noreg, seier Tor Rune Aarø.