Vogntoget er komen om bord, men sjåføren kan ikkje betale det det kostar å vere med. Dette er ifølgje Hole ei ikkje heilt uvanleg hending for ferjemannskap langs norskekysten.
– Eg vil seie at det er eit problem for reiarlaga og mannskapet som opplever slike hendingar, seier Hole. – Det er grunn til å tru at det kan vere store mørketal. Det er inga sjølvfølgje at reiarlaga rapporterer slike hendingar til oss.
Kan bli aktuelt med autopass
Det finst ikkje ein felles måte å handtere slike hendingar på og ferjereiarlaga står fritt til å velje korleis dei vil både handterer og rapportere slike situasjonar.
Nokre sjåførar blir bedne om å betale før dei køyrer om bord. Andre får køyre inn i ferja, men blir nekta å køyre i land dersom dei ikkje kan betale, og må vere med tilbake til ferjekaia der dei kom om bord. Mannskap har også fortalt om hendingar der sjåførar har stukke av utan å gjere opp for seg.
– Det vil vere ein fordel om alle handterte dette likt, seier Hole.
Møre og Romsdal er det største ferjefylket i landet, og Hole meiner difor det er naturleg at fylkeskommunen engasjerer seg for å finne ei felles løysing for heile kysten. Han trur løysinga kan ligge i at betalingsrutinane blir meir like.
– Det vi har diskutert er om vi i framtida kan bruke autopass som betalingsmåte også på ferjene. Det vil gjere det letter for sjåførane å kunne gjere opp for seg.
