– Eg er vanvittig sliten akkurat no, men det er ein fantastisk følelse å lykkast på den viktigaste dagen i året.
Det sa ein sliten Olav Lundanes etter hans andre VM-gull i karrieren.
På tysdag blei det ein skuffande dag for Lundanes. Han kjempa heilt i teten nesten midtvegs, men ein stor bom på niande post gjorde at han måtte ta til takke med ein skuffande 14. plass.
- LES OGSÅ:
- LES OGSÅ:
I dag torsdag fekk han revansjen sin. På langdistansen i Lausanne i Sveits var Lundanes fullstendig suveren. Etter til saman 31 postar enda ålesundaren på soleklar gullplass.
Sluttida hans var 1.34.42, to minutt og femtito sekund framfor nummer to, sveitsiske Matthias Merz. Tysdagens vinnar på mellomdistansen, Edgars Bertuks, tok tredjeplassen.
– Dette er det største
I 2010 tok han VM-gull på heimebane i Trondheim, men dagens gull i Sveits er større, fortel Lundanes.
Olav Lundanes er heilt i verdstoppen i orientering. Her frå EM i Sverige.
Foto: Jens L¥Estrade / NTB scanpix– Det var meir emosjonelt å vinne i Trondheim, men dette er det største. Definitivt, jubla Lundanes.
Før VM hadde Lundanes eit mål om tre VM-medaljar, éin meir enn i 2010 og 2011. Det er umogleg etter blunderen på mellomdistansen, men dagens VM-gull er nok eit enormt plaster på såret.
– Når forstod du at du kom til å ta gullet?
– Det var litt tøft i starten, så eg måtte jobbe hardt, men etter ein halvtime losna det. Då kunne eg trykke på som eg ville.
– Og så klisjeen; Kva føler du no?
– Det er blanda følelsar. Ein er så utruleg sliten, samtidig som følelsen er heilt fantastisk, avslutta ein jublande Lundanes frå Sveits.
Førstkomande laurdag skal det norske laget springe stafetten, og Lundanes har tidlegare uttalt at Noreg no bør ta steget opp til gullplassen.
Resultat på langdistansen:
- Olav Lundanes (Noreg): 1.34.42
- Matthias Merz (Sveits): 1.37.34
- Edgars Bertuks (Latvia): 1.39.13
- Phillippe Adamski (Frankrike): 1.40.19
- Anders Holmberg (Sverige): 1.41.46
- Kiril Nikolov (Bulgaria): 1.41.48
- Dmitriy Tsvetkov (Russland): 1.43.20
- Frederic Tranchand (Frankrike): 1.43.55
- Tue Lassen (Danmark): 1.44.46
- Anders Nordberg (Noreg): 1.44.51
Siste nordmann i finalen, Hans Gunnar Omdal, tok 17. plassen med tida 1.47.18.
I kvinneklassen var Anne Margrethe Nordberg Hausken best av dei norske, der ho blei nummer fem.
