Mange venta lenge på at snøen skulle legge seg, og dei fleste måtte vente heilt til nyåret før det gjekk an å køyre ski i alpinanlegga. Men enkelte fekk starte litt før. Stranda skisenter, det største i Møre og Romsdal, fekk dei første i bakken i romjula i fjor.
Driftsleiar ved skisenteret, Stian Græsdal, fortel at han er fornøgd med sesongen.
– Det har vore veldig bra, trass den trege starten. Men etter at det kom skikkeleg med snø kom også folket, seier han.
Ikkje langt unna, ved Fjellsætra i Sykkylven, har denne sesongen vore overraskande bra. Dagleg leiar, Ole Robert Strømme, syns likevel den var for kort.
– Vi fekk starta litt seint, og påska kom tidleg. Men vi har hatt ein brukbar sesong. Mange besøkande og godt føre i bakken, seier han.
Måtte produsere eigen snø
Også vêret får skryt. Surnadal skisenter kom i gang først 13. januar, men deretter har dei hatt ope kvar dag. Takka vere solid produksjon av snø.
– Vi har hatt ein kjempebra sesong, og mykje meir besøk enn tidlegare. Den snøen vi produserte tidleg i januar gjorde også at vi klarte å halde ope i påska, seier Tove M. Schei ved skisenteret.
Også litt lenger sør for Surnadal har sesongen vore god. Ved Tusten Skiheiser i Molde har det vore klart betre enn dei to siste åra.
– Vi fekk litt lite snø, men vi har hatt mange tilreisande, spesielt i påska. Eg vil seie det har vore brukbart, fortel Pål Nakken.