Før Jugendfest i 2012 hadde publikum allereie i slutten av 2011 fått smakt på dei første artistnamna. Mellom andre Kent og Roxette.
I 2012 har det derimot drøya. Og drøya, og drøya ...
- Les også:
Ventar til alt er på plass
Ante Giskeødegård og Lars Berg Giskeødegård, begge tidlegare medlemmer i The Margarets, fortel at Jugendfest-sleppet er like om hjørnet.
Foto: Hans-Olav Rise / NRKTidlegare år har det kome artistar, frå desember til seinvåren. Midt i mai har det framleis ikkje dukka opp noko festivalprogram. Det einaste som er sagt er at det blir stort.
– Vi har sleppt artistar ein heil del tidlegare før, mellom anna i fjor. I år har vi derimot jobba med nokre store internasjonale artistar som vi vil sleppe aller først, fortel Ante Giskeødegård.
Den daglege leiaren og bookingsjefen i Momentium vil nemleg ikkje ha så mange lause trådar.
– Det meste er på plass, men det er småting igjen i kontraktar på nokre. Vi ventar til alt er på plass, slik at vi slepp noko ekstra.
Saka held fram under bildet.
The Prodigy trekte mykje publikum under Jugendfest 2012.
Foto: Hans-Olav Rise / NRK– Fordel med store namn klart tidleg
Andre festivalar i Noreg, som kjende Øyafestivalen i Oslo, startar artistsleppet allereie i november – berre tre månader etter førre festival.
– Det er sjølvsagt ein fordel å ha eit par store namn klart tidleg. Dei største festivalane – Øyafestivalen, Hovefestivalen og Slottsfjellfestivalen – slepp headlinerar i desember året før.
Det seier Marius Asp, vaktsjef og musikkanmeldar i P3 Musikk i NRK. Det betyr derimot langt meir kven artistane som blir sleppt er.
– Naturlegvis betyr det meir kven som faktisk spelar. Eit fleirtal av norske festivalar opererer med artistane som reiser rundt den sommaren. Det handlar meir om fest og trygge, folkelege namn.
– Høyrer Jugendfest til den gruppa er det ikkje sikkert det har noko å seie, meiner Asp.
Aukande spørsmålsfrekvens
Jugendfest ligg vel i landet mellom dei mest folkelege festivalane og dei meir «hippe», som for eksempel Øyafestivalen.
I seinare år har artistar som Bjørn Ferry, The Prodigy og Roxette vore trekkplaster. I år har det blitt lova endå større artistar, då festivalen skal gå over to, ikkje tre, dagar.
– Vi har jobba med nokre fine artistar, og det er nok difor det drøyer, ja. I løpet av mai har vi garantert byrja artistsleppet, fortel Giskeødegård.
Spørsmåla, frå både venner, folk flest og media, om artistslepp har det derimot blitt mange av.
– Vi har fått ein del spørsmål den siste tida. Folk lurer veldig no, men vi har også bevisst latt fokuset vere litt ekstra på dei andre festivalane våre.
- Les også:
Saka held fram under bildet.
Marius Asp trur ikkje seint slepp har positive innverknader på billettsalet.
Foto: Kim Erlandsen / NRK P3– Bør vere gjort
Asp i P3 Musikk er innom mange konsertar og festivalar i løpet av eit år. Å sleppe billettane såpass seint gagnar ikkje billettsalet, trur han.
– Med tanke på billettsal har det nok ikkje så mange positive sider. Men dei har truleg lagt planane for både sommaren og vidare, meiner Asp.
– Kan det byggje litt ekstra forventningar å vente med artistsleppet?
– Ja, det kan det nok, men sjølve bookingarbeidet bør vere gjort.
Stadionnisje?
Når Asp ser på tidlegare program, sidan 2008 og fram til no, ser han mange ganske trygge namn.
– Typen headlinerar er nok den typen som passar best for ein mellomstor festival. Nostalgi er eit stikkord, der fleire av artistane appellerer til eit festivalpublikum som vaks opp på 80- og 90-talet.
Publikum under Jugendfest 2012 hadde lite å utsette på festivalen. Asp i P3 Musikk meiner eit konsentrert festivalprogram kan gjere ting endå betre.
Foto: Hans-Olav Rise / NRK– Unge namn er nok ein fordel, men eg trur dei eldre og etablerte namna er viktigaste å treffe med, seier Asp.
Jugendfest blei for første gong arrangert på Color Line Stadion, der Aalesund til dagleg spelar heimekampane sine i Eliteserien.
– Kan Jugendfest satse på å bli ein stor stadionfestival, i ei eiga nisje?
– Det kan nok hende, men då er dei svært avhengige av namn dei veit vil selje billettar. Eksklusivitet har ikkje nødvendigvis så mykje å seie for den gjengse festivalgåar.
– I år går festivalen over to dagar, ikkje over tre som i fjor. Må det ekstra store namn for å få like god inntening då?
– Det er alltid eit komplisert reknestykke, med tanke på honorar, driftskostnader og festivaløkonomi.
– Heilt generelt trur eg festivalar gjer lurt i å konsentrere godsakene. Det krev færre artistar og mindre arbeid for å få til to gode dagar, samanlikna med tre gode dagar, avsluttar Asp.
