Marianne Ristesund - Marianne Ristesund har vore rusmisbrukar heile sitt vaksne liv. No får ho hjelp - Foto: Anne-Bente Skjellum /

Marianne Ristesund har vore rusmisbrukar heile sitt vaksne liv. No får ho hjelp

Foto: Anne-Bente Skjellum

Rusmisbrukarar får meir hjelp

Firebarnsmor Marianne Ristesund har vore avhengig av rus i heile sitt vaksne liv. No får sunnmørskvinna hjelp.

Ho hadde ein god jobb som ambulansesjåfør og hjelpepleiar, men rusen tok overhand. Først alkohol i mange år, deretter amfetamin.

Liv eller død

No har firebarnsmora vore rusfri i 16 månader og ho takkar tilbodet om ettervern for det.

-For meg betyr det nesten liv eller død, seier Marianne Ristesund.

Betre oppfølging

Ettervern betyr at pasientar som er utskrive frå rusbehandlingsinstitusjonen får vidare oppfølging. I mai i fjor fekk Vestmo behandlingssenter i Ålesund eit dagtilbod, der pasientar vert følgt opp i minst eitt år etter klinikkopphaldet.

Lever i ei boble
Tore Sponland - Tore Sponland er ansvarleg for dagtilbodet ved Vestmo behandlingssenter i Ålesund - Foto: Anne-Bente Skjellum / NRK

Tore Sponland er ansvarleg for dagtilbodet ved Vestmo behandlingssenter i Ålesund

Foto: Anne-Bente Skjellum / NRK

Ansvarleg for dagtilbodet, Tore Sponland ser at færre pasientar no fell ut undervegs.

-Det er når ein kjem ut frå institusjonen at arbeidet startar, seier Sponland.

Han meiner at det å vere innlagt på institusjon, er som å leve i ei boble. Då har pasienten dei tilsette rundt seg heile tida, og ein har eit fellesskap med andre i same situasjon.

-Når vi no tilbyr vidare oppfølging, får rusmisbrukaren møte utfordringane i kvardagen, samstundes som behandlinga fortset, seier Sponland.

Motivasjonen aukar

Også Ålesund kommune ser at ettervern har virka. Kommunen står klar med rehabiliteringsbustader og miljøterapeutar som skal hjelpe dei tidlegare rusmisbrukarane tilbake til samfunnet.

Liv Trædal - Liv Trædal i Ålesund kommune - Foto: Anne-Bente Skjellum / NRK

Liv Trædal i Ålesund kommune

Foto: Anne-Bente Skjellum / NRK

– Vi ser heilt klart at det gjer noko med motivasjonen at pasienten veit at det står eit apparat klart til å ta imot, etter at behandlinga er ferdig, seier Liv Trædal i Ålesund kommune.

Kutta vennar

Marianne Ristesund har prøvd å kutte rusmisbruket på eiga hand fleire gongar, men har ikkje klart det.

Sunnmørskvinna har ho vore i behandling i to år. For å klare å halde seg rusfri, har Ristesund kutta kontakt med vener i miljøet. Det vanskelegaste no er å lære seg å leve eit normalt liv på nytt.

-No har eg det veldig bra. Og eg har lært at det ikkje er farleg å be om hjelp, seier Ristesund.

Siste video/lyd

Evakuerte frå området ved fjellet Mannen i Rauma håper skredet kan gå i løpet av kort tid, slik at dei kan kome tilbake til eit normalt liv. Ekspertane trur fjellpartiet kan losne i neste veke.
Søndag kan Kristiansund styrke sjansane sine til opprykk til Eliteserien når Hødd kjem på besøk i 1.divisjon i fotball. Ei optimistisk klubbleiing håper på publikumsrekord, medan trenaren enno ikkje vil snakke verken om opprykk eller tabellplassering.
Tre menn og ei kvinne er varetektsfengsla i fire veker etter at ein mann vart funnen død i eit hus i Spjelkavik tysdag. Det oppstod brann i huset men politiet opplyser at vald var dødsårsaka.