Palmesøndag hadde akvariet gjestar frå Tyskland, Polen, Storbritannia, Litauen, Danmark, Frankrike, Tsjekkia, Færøyene, Finland og USA – i tillegg til nordmenn. Blant dei norske besøkande var 16 av 19 fylke representerte. Berre Finnmark, Troms og Aust-Agder mangla på gjestelista.
– Ikkje berre ski i påska
Dagleg leiar ved Atlanterhavsparken, Tor Erik Standal, fekk hakeslepp då han såg besøkstala i dag tidleg.
– Eg blei veldig overraska. Eg ante ikkje at vi var så populære, seier han.
Påska er ferietid og mange besøker venner og familie, noko som truleg er sterkt medverkande til besøkstala. Konklusjonen blir også at påska er langt meir enn fjell og ski.
Besøksstatistikk
Sidan den nye attraksjonen, Selbukta, opna i fjor haust, har Atlanterhavsparken spurt sine besøkande om kva postnummer dei bur på eller kva land dei kjem frå. Sidan då har talet på nasjonalitetar snart kome opp i 50.
– Det er viktig for oss å vite kvar våre besøkande kjem frå så vi kan setje inn marknadsføringa vår på rett stad, seier Standal.
Flest lokale gjestar
To av tre besøkande kjem framleis frå det Atlanterhavsparken definerer som nærområdet sitt, det vil seie innanfor ei reisetid på tre timar.
Den svenske nettstaden barnsemester.se har for andre gong kåra Atlanterhavsparken til Nordens beste akvarium. Det skadar vel ikkje det heller.