Ny status skal selje verdsarvområde

Det er Vestnorsk Fjordlandskap ved Geirangerfjorden, Bergkunsten i Alta og Vegaøyan i Nordland som kan smykke seg med den nye tittelen.

Statusen skal sikre at både besøkande og fastbuande skal få god og brei informasjon, i tråd med krava i verdsarvkonvensjonen.

– Dette er noko heilt nytt i Noreg, seier klima- og miljøminister Tine Sundtoft.

– Det er eit kvalitetsstempel, som både vi og fagmiljøa i områda har jobba lenge for å få til.

– Kvifor akkurat desse tre?

– Det er fordi dei har kome lengst med å etablere slike senter. No vil vi hjelpe til med å heve kvaliteten på informasjonen dei gir.

– Ein merkedag

For verdsarvmiljøet i Geiranger er utmerkinga svært viktig.

– Det er etablert ein ny senterkategori i Noreg, og at vi er plukka ut som ein av dei tre første, er svært gledeleg, seier direktør Katrin Blomvik.

Dei er i gang med ei utviding av senteret, som frå før husar ei utstilling om verdsarvområdet. No får dei 1,2 millionar kroner til drift ut året og ein halv million kroner til å utvide utstillinga.

– Eg trur folk flest vil merke det på at vi får høgare kvalitet på utstillingane våre, og at vi rettar oss meir direkte inn mot verdsarvstatusen og grunnlaget for den, seier ho.

• Les også: Verdensarvsenter får nasjonalt kvalitetsstempel
• Les også: Studerer 7000 år gammel kunst i mørket

Må oppfylle krav om god informasjon

Som ein del av løyvingane frå departementet får sentra ei basisutstilling om verdsarven som skal inngå i dei permanente utstillingane. I tillegg får Alta 1,2 millionar kroner til drifta i år, medan Vegaøyan får 850 000 kroner til det same

Sundtoft trur statusen blir viktig i marknadsføringa av områda.

– Turistar som er på jakt etter det unike kan få god informasjon gjennom desse sentra, og det vil vere viktig i marknadsføringa internasjonalt.

Autorisasjonen gjeld i første omgang for fem år og kan bli permanent dersom sentra viser at dei kan oppfylle krava om god informasjon.