– Vi kan no auke tilbodet vårt med mellom 18 til 23 døgnplassar. Til vanleg har vi 65 pasientar frå Midt Norge, noko som betyr at vi no får ei auke i talet på pasientar, seier Glenn Hole, administrerande direktør ved Muritunet.
Avtalen, som trer i kraft tysdag, spring over fire år og har ein verdi på 45,4 millionar kroner. Hole er svært fornøgd med den nye avtalen.
– Det betyr svært mykje for oss at vi har fått denne avtalen, og dei tilsette fortener mykje av æra for denne moglegheita, dei gjer ein fantastisk jobb, seier han.
- Les også:
Viktig for vidare drift
Deltakarane kjem til Muritunet og blir der i fire veker. I løpet av den tida skal dei gjennom ulik arbeidstrening, både gruppebasert og individuelt tilpassa etter behov.
– Dette betyr at vi kan behandle enno fleire som er sjukmelde eller har nedsett arbeidsevne, og hjelpe dei med å kome tilbake i arbeid, i staden for å vere sjukemeldt eller deltidssjukemeldt. Deltakarane vil også få oppfølging etter at dei fordelt Muritunet, seier han.
Muritunet har per i dag 55 årsverk, og kjem til å utvide kapasiteten sin noko. Hole fortel at anbodet er viktig for vidare utvikling av Muritunet.
– Denne avtalen sikrar drifta i fire nye år. Det gir oss eit ekstra bein å stå på samtidig som det sikrar framtidig drift og arbeidsplassane ved Muritunet, seier han.
– Dette gir oss også moglegheit til å utvikle tilbodet vårt vidare. No skal vi blant anna ha arbeidstrening, det har vi aldri hatt før så det blir veldig spennande, held han fram.