Det var onsdag klokka 05.37 at naudetatane fekk melding om ein bil som hadde køyrt av vegen mellom Verma og fylkesgrensa i Rauma. Ulukka skjedde på E136 ved Sæterbø.
Føraren av bilen, ein 37 år gammal mann, blei funnen omkomen i bilen.
Klokka 19.30 onsdag opplyser operasjonsleiar Tore Hals i Nordmøre og Romsdal politidistrikt at det var Ole Christian Thunes frå Brønnøysund som omkom.
Alle pårørande er varsla, slår politiet fast.
Sjuåringen varsla om ulukka
I tillegg til 37-åringen var mannen sin sju år gamle gut i bilen.
Guten kom seg opp på vegen og fekk stoppa ein forbipasserande, som igjen varsla politiet. Guten sjølv blei flogen til St. Olavs Hospital i Trondheim.
Seinare på dagen var tilstanden til den unge guten stabil. Skadane var moderate, men barnet blei lagt inn på barneintensiven til observasjon.
Guten var altså også heimehøyrande i Nordland. Det var ikkje andre involverte i ulukka.
Område utan autovern
– Det er for tidleg å seie noko om kva som har skjedd, sa operasjonsleiar Tore Hals i Nordmøre og Romsdal politidistrikt til NRK tidleg onsdag.
Statens vegvesen si ulukkesgruppe blei tilkalla – som vanleg i dødsulukker, opplyste Hals.
Det er klart at bilen køyrde utfor vegen på eit område utan autovern.
Saka vil bli etterforska vidare av lensmannskontoret i Rauma.
Beklager, vi kunne ikke vise innholdet.
Se «Dødsulukke på Verma i Romsdal» i nytt vindu
