Leirskule er ei teneste som ikkje er lovpålagt. Likevel vil både Kristiansund og Molde mest sannsynleg tilby leirskule, også neste år.
- Les også:
Spjelkavik barneskule er ein av det største barneskulane i fylket. Elevane her får ikkje lenger reise på leirskule, som mange ser på som eit høgdepunkt.
– Viktig tilbod
Rektoren på skulen, Grete Herje, meiner det er tøysete å kutte leirskuletilbodet.
– Det er snakk om så lite pengar, så økonomisk har dette lite å seie. Eg meiner at det er eit viktig tilbod til elevane, seier Herje.
Ho er klar på at leirskulen betyr veldig mykje for elevane i løpet av dei ti åra dei går på skule.
Konsekvensane
Arne-Johan Gagnat ved Solhøgda Leirskole på Sunndalsøra seier at dette betyr veldig mykje for den enkelte elev.
– Det er rørande å sjå kor takknemlege elevane er etter eit opphald på leirskulen. Det er ei veke dei huskar resten av livet, seier Gagnat.
Han trur det hadde blitt trist for elevane om dei ikkje fekk dette tilbodet. Sjølv ønskjer han øyremerkte pengar frå Staten slik at dette tilbodet kan halde fram.
Ingen blir skjerma for kutt
Knut Anders Oskarson, som er leiar for komiteen for Kultur og Oppvekst i Ålesund, seier at kommuneøkonomien er svært anstrengt.
- Les også:
– Det er nødvendig å gjere tøffe kutt for å kome vidare. Her er det ingen sektor som blir skjerma, og leirskulen er minst vond å ta vekk, seier Oskarson, og legg til at dei 1,4 millionane, som leirskulen kostar, er mykje.
Forslaget til budsjett vil ligge ute på høyring fram til budsjettet skal behandlast endeleg i bystyret 4. desember.
Oskarson meiner at det er betre å kutte leirskulen enn å måtte hogge inn i den ordinære klasseromsundervisninga.